Prijsnan halto di energia lo cuminsa impacta industria alimentario Hulandes mientras guera cu Iran ta sigui

(NLTimes) – Considerando e guera cu Iran no ta mustra señal di caba, companianan den industria alimentario Hulandes por spera pa cuminsa sinti e impacto di e prijsnan mas halto di energia, Financieele Dagblad y De Telegraaf a reporta, basa riba un analisis di ABN Amro. Industria alimentario Hulandes ta dependiente hopi di gas natural, pues esaki lo ta un golpi grandi.

Prijsnan di energia a subi drasticamente desde cu Merca y Israel a cuminsa ataca Iran na februari. Pa motibo di e guera, transporte door di Estrecho di Hormuz, un ruta principal di transporte maritimo pa petroleo y gas natural, a ser severamente limita. Presidente di Merca Donald Trump recientemente a bisa cu e contra-blokeo Americano di e Estrecho no lo termina pronto.

Industria alimentario Hulandes caba tin cu absorba costonan mas halto pa transporte riba caminda, tarifanan di container y carga aereo. Y hasta si e guera caba awe, prijsnan di combustible lo keda halto pa un periodo prolonga pasobra hopi facilidadnan di produccion y transporte a ser severamente daña.

P’esey, ta inevitabel cu e sector lo enfrenta prijsnan di energia significativamente mas caro ora nan contractnan caba. Esaki lo ta un golpi grandi, considerando e dependencia di energia di e sector. Desde e crisis di energia di 2022, e industria alimentario a logra reduci su consumo di energia cu 3 porciento, compara cu un reduccion promedio di 11 porciento pa economia Hulandes.

Industria alimentario Hulandes ta mas dependiente di gas natural, cu ta representa aproximadamente 70 porciento di e mescla total di energia di e sector. Industria di azeta y grasa ta esun mas dependiente di gas natural (97%), sigui pa hariña (89%) y lacteo (75%). Mataderonan tin e dependencia mas abao cu 42 porciento.

Companianan cu a electrifica nan proceso lo cosecha e beneficio den e periodo binidero. Sinembargo, hopi proceso den industria alimentario ta dificil pa electrifica pasobra nan ta rekeri temperaturanan halto di mas cu 100 grado Celsius.

Alternativanan mas sostenibel normalmente ta mas caro, y companianan kier ta sigur cu nan lo recupera e inversion. “Esaki ta traha contra e realidad den industria alimentario, unda hopi biaha ta conclui contractnan pa apenas un of dos aña,” ABN Amro a bisa.