Cantante di Bachata, Prince Royce a bisa cu el a wordo sorprendi pa un diagnostico di Covid-19 y awo e kier purba di crea consciencia cerca otronan.
Royce a revela cu e ta recuperando di e virus den un entrevista cu AP diahuebs.
Royce, di 31 aña di edad, a bisa cu el a dicidi di papia pa motibo di frustracion aumentando di mira hende saliendo y reuniendo sin bisti mask – hasta mientras cantidad di caso ta den aumento na varios estado. Y igual na hopi hende, e ta preocupa cu mas hende lo wordo infecta durante weekend di festividad di Fourth of July na Merca.
“Prome mi tabata spanta, manera ‘niun hende por haya sa, mi no mester bisa niun hende’. Pero mi a sinti cu mi tin deber di informa mi comunidadnan. Mi ta biba na Florida, mi ta di New York, mi tin un cas na California. Y mi ta mira kico ta pasando na e pais”, el a bisa via Zoom for di su cas na Miami.
Tur cos a cuminsa p’e diadomingo dos siman pasa, momento cu el a lanta memey di anochi no sintiendo bon despues di pasa un dia den pool trahando video di TikTok y cu un ‘dolor fuerte di cabes’. Pero el a kere cu tabata pa motibo di pasa un dia den solo y airco, y a bay drumi bek. Mainta e tabata sinti pio y tabatin kentura di 101 grado. El a bebe remedi. Dialuna, e kentura a bay pero e dolor di cabes a persisti. El a dicidi di haci test ‘djis pa ta responsabel’, y asina el a haya sa.
Royce a bisa cu el a haya un shock cu e diagnostico. “Mi a kere mi tabata labando man, bistiendo mondkap. Y pa mi esey tabata un sorpresa, manera mi ta mirando esaki riba television tur dia. Mi a kere cu sigur ami no a hay’e pasobra mi ta tumando precaucion.”
Royce no sa con el a haya Covid-19, pero ta admiti cu despues di tres luna den cuarentena, reapertura di bar y restaurant a dun’e un sentido falso di siguridad. Ni su esposa Emeraude Toubia ni e hende cu ken el a bay come a bira malo.
Maske en general e ta sinti bon y ta kedando positivo, tin dia cu tabata miho cu otro. El a bisa cu el a perde rosea despues di un workout recien. “Djis pasobra bo ta jong no kiermen bo no ta bay hay’e. No haci egoista y comete e mesun erornan cu ami probablemente a comete.”
