(TMZ) – Prins Harry no a reserva ningun comentario durante su prome dia testiguando na corte di London, unda el a critica fuertemente e prensa Britanico durante e huicio tocante violacion di privacidad cu a tuma luga pa añanan largo.
Su declaracion aparentemente tabata 55 pagina largo, tratando tur topico desde empleadonan anterior di Prinses Diana, incluyendo su ex sirbido Paul Burrell, ken segun e prins tin “dobel cara”, na voicemail cu e ta bisa a ser asesora prome cu e mes por a tende nan.
Tambe tin un parti impactante unda e ta conta con el a sinti entre aña 2000 y aña 2010, e periodo unda e supuesto hacking a tuma luga. El a bisa cu “al contrario di e impresion general,tempo mi tabata un miembro activo di e famia Real, solamente 5% di mi fondonan tabata bin di pueblo. Sinembargo, e ta manera si prensa tabata kere cu nan ta doño dimi completamente y tabatin derecho di sa tur detaye di mi bida, mi accionnan y e hendenan den mi alrededor.”
Ora a puntra e motibo dicon e tabata sinti cu a hack su telefon, e ta conta cu e tabata ricibi notificacion pa voicemail nobo pero ta mira e notificacion disparce prome cu e mes por a tende e mensahe cu a laga pa su persona y segun e Prins esaki tabata tuma luga frecuentemente.
Tambe e ta conta cu tabatin un tempo unda a plama un storia cu e tabata yiu di James Hewitt y esaki tabata increiblemente doloroso pa e Prins, pa motibo cu esaki a causa preocupacion cu nan lo saca su persona for di e famia Real pa causa di e speculacion.
Por ultimo, el a dirigi su mes na Piers Morgan, ken aparentemente ta e persona cu tabata duna ordo pa e hacking y spionahe mirando cu e tabata den posicion halto na Daily Mirror. Tambe e ta alega cu Piers ta tras di atakenan similar recientemente contra e y su casa, Meghan Markle.
E Prins a clausura bisando “con hopi sanger mas mester mancha nan dede cu ta type prome cu un hende para tur e locura aki? Algun di e editornan y reporteronan ta responsabel di causa hopi dolor, sufrimento y den algun caso, papiando personalmente, morto.”
