(AP) — Un dam mayor den sur di Ucrania a collapse ayera, inundando pueblonan, poniendo cultivo den peliger y menasando suministro di awa potable mientras ambos banda di e guera a core evacua residentenan y a culpa otro pa e destruccion.
Ucrania a acusa forsanan Ruso di rementa e dam y stacion hidroelectrico Kakhoivka, cual ta riba e Riu Dnieper den un area cu Moscu ta controla pa mas cu un aña. Oficialnan Ruso a culpa bombardeo Ucraniano den e area den disputa. No tabata posible pa reconcilia e acusacionnan conflictivo.
Oficialnan Ruso y Ucraniano a usa terminonan manera “desaster ecologico” y “acto terorista” pa describi e cantidad di awa bashando door di e dam kibra y cuminsa laga bashi un reservoir cu ta un di e mas grandinan na mundo.
Presidente Ucraniano, Volodymyr Zelenskyy a referi na e suceso como “e desaster ambiental causa pa hende di mas grandi na Europa den decadas.” Secretario General di Nacionnan Uni, Antonio Guterres, prome cu un reunion di Conseho di Seguridad a referi na “otro consecuencia devastador di e invasion Ruso na Ucrania,”
E consecuencianan ambiental y humanitario rapidamente a bira cla mientras hogar, caya y negoshi a inunda y teamnan di emergencia a cuminsa evacuacion. Oficialnan tabata monitor awa pa sistemanan di friamento na e planta nuclear Zaporizhzhia, y autoridadnan a expresa preocupacion tocante suministro di awa potable den areanan controla pa tanto Rusia como Ucrania.
Autoridadnan Ruso y Ucraniano a trece trein y bus pa move residentenan na seguridad. Como 25mil persona den areanan controla pa Rusia y 17mil den teritorio controla pa Ucrania mester keda evacua, segun fiscal interino di Ucrania, Viktoriia Lytvynova a bisa riba television estatal. Ningun banda a reporta morto of herido.
No tabata inmediatamente cla pakico un di e bandanan lo kier destrui e dam, y su collapse por tabata e resultado di degradacion gradual. Terenonan controla pa Rusia y Ucrania ambos tabata den riesgo.
Minister di Defensa Ruso, Sergei Shoigu a acusa Ucrania di destrui e dam pa preveni potencial atakenan Ruso den region Kherson despues di loke el a bisa tabata un contraofensiva fracasa di Ucrania. El a bisa cu Ucrania a perde 3,715 trupa y 52 tanki desde diadomingo, y – den un reconocemento inusual di e perdidanan di Rusia – a bisa cu 71 trupa Ruso a ser mata y 210 herida. Ucrania a sigui su practica standard di no comenta causalidadnan.
Zelenskyy a alega cu forsanan Ruso a rementa un explosion paden di e structura di e dam pa 2:50am y a bisa cu como 80 asentamiento tabata den peliger.
Vocero di Kremlin, Dmitry Peskov a yam’e un “acto intencional di sabotahe di banda Ucraniano” cu intencion pa corta suministro di awa pa Crimea.
Expertonan anteriormente a bisa cu e dam tabatin mester di reparacion, cu por a conduci na e collapse. David Helms, un cientifico Mericano pensionado kende a monitor e reservoir desde comienso di e guera, a bisa den un email cu no tabata cla si e daño tabata intencional of simplemente negligencia di e forsanan Ruso ocupando e facilidad. Vocero di Conseho di Seguridad di Cas Blanco, John Kirby a bisa cu Merca “no por bisa conclusivamente kico a pasa” y a nenga di bisa ki impacto Merca ta kere por tin riba e contraofensiva Ucraniano.
Pa varios luna, autoridadnan, experto y residentenan tabata preocupa tocante fluho di awa door – y riba – e dam Kakhovka. Despues di yobida pisa y sneeuw cu a smelt luna pasa, nivelnan di awa a eleva riba loke ta normal, inundando pueblonan cercano.
Ambos banda a adverti di un desaster ambiental. Oficina Presidencial Ucraniano a bisa cu como 150 ton metrico di azeta for di makinaria di e dam y otro 300 ton metrico ainda por leak.
E incidente tambe a genera condena internacional, incluyendo for di canciyer Aleman, Olaf Scholz y Secretario General di NATO, Jens Stoltenberg, kende a bisa cu e “acto descabeya … ta demostra un biaha mas e brutalidad di e guera Ruso na Ucrania.”
Ucrania ta controla cinco di e seis dam na e Dnieper, cu ta core for di su frontera nort cu Belarus te abao na e Lama Preto y ta crucial pa e suministro di awa potable y coriente pa e pais como tambe esun di Crimea, ocupa pa Rusia.
Compania estatal di generacion di coriente hydro a bisa cu e stacion di electricidad di e dam “no por wordo restaura.” Ukrhydroenergo tambe a bisa cu Rusia a destrui e stacion for di paden di sala di motor.
Ucrania y Rusia den pasado a acusa otro di ataca e dam.
Aumento di prijs di trigo
Subrayando e repercusionnan global, prijs di trigo a aumenta 3% despues di e collapse. No ta cla si e aumento den prijs di trigo tabata pa motibo di un menasa real cu awa di inundacion por destrui cultivo. Ucrania y Rusia ta proveedornan global clave di trigo, cebada, azeta di sunflower y otro cuminda pa Africa, Medio Oriente y algun parti di Asia.
