(AP) – Prins Harry su lucha pa tin proteccion paga cu fondo publico a keda rechasa diaranson pa hues na London, ken a bisa cu gobierno di Reino Uni no a actua iracionalmente ora cu nan a kita su privilegionan di seguridad despues cu el a retira di su responsabilidadnan como miembro di famia Real y a muda bay biba na Merca. Harry tin plan di apela e decision aki.
Hues di Corte Superior, Peter Lane a bisa cu e decision tuma pa provee seguridad na e Duke di Sussex ora cu esaki ta necesario no tabata fuera di ley, iracional ni tampoco un decision sin hustificacion. “No tin suficiente prueba cu por comproba cu e metodo di provee seguridad ora cu esaki ta necesario a causa dificultad y pa considera esaki un decision iracional,” Lane a skirbi den e veredicto di 51 pagina cu a ser censura pa proteha e identidadnan y areglonan di seguridad pa Harry y otro figuranan publico.
Harry a bisa cu e tin plan di apela e veredicto den e caso aki y sigui desafia e decision di e grupo conoci pa su nomber anterior RAVEC, Royal and VIP Executive Committee, segun un vocero.
