(AP) – E audiencia na un festival di musica na Houston diripiente a core bin serca di escenario durante presentacion di rapper Travis Scott, presionando e fanaticonan asina fuerte den otro cu nan no por a respira ni move nan mannan, resultando den e fayecimento di 8 persona den e caos.

E caos a tuma luga riba diabierna anochi na Astroworld, un evento di dos dia cu ta completamente sold out, cu lo tuma luga na NRG Park cu un cantidad di mas o menos 50,000 persona cu a atende. Na momento cu un timer a cuminsa e conteo pa e comienso di Scott su presentacion, e fanaticonan a pusha bay dilanti.

“Na momento cu el a subi escenario, ta manera si un energia a tuma control di e ambiente y tur cos a sali for di man,” un di e personanan presente na e concierto a declara. “Diripiente, bo ribchi nan ta preta. Bo tin un hende su man na bo neck, bo ta purba di hala rosea pero bo no por.”

Goods a bisa cu e tabata asina desespera pa sali cu el a morde un homber su schouder pa e por hala for di su caminda.

E fayecidonan tabata varia den edad, di entre 14 aña pa 27, y 13 persona te ainda tabata hospitalisa riba diasabra, alcalde Sylvester Turner a bisa. El a yama e desaster “un tragedia riba hopi diferente nivel” y a bisa cu tabata hopi trempan pa por descifra unda cos a bay fout.

“E ta posibel cu e tragedia aki ta e resultado di eventonan cu ta fuera di control, of di cierto circunstancianan cu a bini hunto y no por a ser evita,” Hues Lina Hidalgo, Harris County su oficial a declara. “Pero te ora cu nos por determina esaki, nos lo haci e preguntanan fuerte y importante.”

Expertonan cu a studia e mortonan causa pa eventonan asina den audiencia a bisa cu hopi biaha e ta resultado di densidad, demasiado hende den un espacio chikito. E publico hopi biaha ta coriendo for di un peligro of den direccion di algo cu nan kier, manera e persona presentando, prome cu nan dal contra e baricada.

G. Keith Still, un profesor bishitante di ciencia di publico na United Kingdom su University of Suffolk, a testigua como un testigo experto den casonan di corte cu ta envolve publico. El a bisa cu usualmente e no ta mira reportahe ni declaracion di testigonan presente den e prome etapanan di analisa e incidente pa motibo cu emocionnan y sentimentonan por afecta e imagen den e persona su cabes, y testigonan solamente ta mira loke ta directamente rond di nan.

Basa na codigo di candela, e luga por a wanta un cantidad di 200,000 persona, pero e oficialnan di e ciudad a limita e entrada na 50,000 hende so, Houston Fire Chief Samuel Peña a bisa.

“E problema tabata e control di e audiencia dilanti e escenario, specialmente na momento cu e hendenan a cuminsa pusha pa bin mas cerca di escenario.

E morto a trece na mente un concierto di ana 1979 di The Who unda cu 11 persona a fayece, pa motibo cu miles di fanatico a purba di drenta Cincinatti Riverfront Coliseum. E otro tragedianan cu a tuma luga den audiencia ta inclui e morto di 97 persona na un stadion di Hillsborough den ana 1989 na Sheffield, England y varios otro desaster conecta cu e celebracion annual hajj na Saudi Arabia.

Hende den e audiencia na Houston a reporta hopi pushamento y halamento di hende durante e presentacionnan prome cu esun di Scott.

Despues, na momento cu Scott a subi escenario, e audiencia a cuminsa pusha bay dilanti, purbando di yega mas cerca cu ta ppsibel na e escenario, Nick Johnson, un studiante di scol di Houston, Friendswood cu tabata presente na e concierto a splica.

“Tur hende ta cuminsa cay flauw bo dilanti, y tur hende ta purba di yuda otro. Pero bo no por a move. Bo no por haci nada. Bo no por nisikiera hisa bo mannan,” Johnson a declara. “E tabata keda bira mas pio cada biaha.”

Johnson a bisa cu fanaticonan a cuminsa pres contra di otro, y hendenan a cuminsa grita. El a conta cu e tabata sinti manera 100 grado den e audiencia.

Scott aparentemente tabata consciente cu algo tabata pasando den e audiencia, pero probablemente e no a compronde e gravedad di e situacion, Johnson a expresa.

Un video publica riba rednan social, Scott a ser mira ta para e concierto y pidi ayudo pa un persona den e audiencia bisando “security, algun persona yuda akinan un rato.”

Den un publicacion haci riba e red social Twitter, Scott a bisa cu e ta “absolutamente disgusta” cu loke a tuma luga ayera anochi.” El a compromete su mes di “traha cu e comunidad di Houston pa yuda sana y apoya e famianan den necesidad.”

 

LEAVE A REPLY

Please enter your comment!
Please enter your name here