E dia di ayera turistanan Mericano a publica riba rednan social diferente potret unda por a mira rijnan largo di turistanan para pafo di aeropuerto wardando pa nan por drenta, haci check in, entre otro.
Esaki a hala atencion di diferente personanan riba rednan social unda cu nan tabata señala cu e sistema di inmigracion mester a bay di manera manual. Algun di nan a bisa cu nan a yega, baha for di avion y mester a yena formularionan por escrito; cu tambe tabatin retraso di vuelonan pa por sali pa e mesun motibo tecnico aki, y cu esaki tabata algo cu algun di e turistanan cu tin varios aña bishitando Aruba nunca a mira. Un situacion cu a causa mal contento y cu no tabata un bon manera pa nan caba nan vakantie, segun nan mes a expresa.
Redactor di Bon Dia Aruba a tuma contacto cu PR di Aeropuerto Internacional Reina Beatrix, Endy Croes kende a indica cu efectivamente “tabatin un problema chikito cu e sistema di inmigracion pero el a wordo resolvi ayera mes”.
