IMG-20150917-WA0003.jpg

ORANJESTAD – Trahadonan y gerencia di Renaissance a haya otro hunto cu minister di transporte Otmar Oduber despues di un reunion diahuebs mainta na su oficina. Representantenan di un grupo di 550 trahado di e compleho hotelero a mustra nan preocupacion durante e reunion ey, pa medio di un accion di firma. Minister a mustra nan cu a haci intento anteriormente, pero cu no a haya reaccion di gerencia. Durante e reunion, gerente a ‘come across’ y a bay di acuerdo cu un sugerencia di parti di gobierno, pa aloca extra lugar pa parkeer pa e trahadonan.

E mandatario a trata cada un punto di preocupacion cual entre otro tabata e aspecto di siguridad specialmente anochi pa esunnan cu ta traha warda. E mandatario a comenta cu ya caba tin personal di siguridad y tin un plan pa aumenta e cantidad di personal di siguridad den e areanan concerni. Oduber a describi tambe cu ya ta trahando diferente torennan pa e personal di siguridad por tin un miho bista riba e areanan. A corto plaso por menciona tambe cu Aruparking ta trahando di cerca cu Elmar N.V. pa añadi mas iluminacion den e areanan mas critico.

Aki ta unda cu e oferta a bin dilanti, cu gobierno a haci na e gerencia, pero cu lo no a haya reaccion ariba. Segun Oduber, a ofrece gerencia di Renaissance e opcion pa un area completo, destina pa nan empleadonan, di cual no a ricibi reaccion manera a spera. A haci un di dos oferta siman pasa y no a haya un contesta definitivo riba e proposicion. Un rato prome cu e reunion cu e empleadonan, gerencia di Renaissance a bay di acuerdo cu e proposicion di Aruparking pa tin un espacio adicional, banda di nan tres parking lotnan, destina pa nan trahadonan. Awor e empleadonan por ta mas trankil riba e inkietud di nan espacio pa staciona nan vehiculonan.

Un total di entre 500 pa 550 trahado, -di un total di 750-, di Renaissance Hotel a participa diahuebs mainta den un accion di firma contra e situacion di parkeer cu a surgi cu e entrada di e ‘parkeermeter’. Despues di un siman y mei di operacion, ta bisto cu e trahadonan no ta nada contento cu e situacion, y nan a dicidi di vocifera esey. Gerente general di Renaissance, Paul Gielen a confirma e accion na NoticiaCla.com y a mustra cu nan ta sostene como gerencia, e accion aki. “E ta duro pa nan, e placa, e ora di parkeer, inseguridad” Gielen a bisa.

Mientras cu e ta confirma e cifra di esnan cu a firma, e ta bisa cu esey no ta nifica necesariamente cu e resto di e 750 trahadonan no ta sostene e accion. Gielen ta mustra cu mientras cu no ta gerencia a inicia e proceso aki (e ta lidera pa dos trahado cu a organisa e actividad di firma), gerencia ta sostene e accion y tin full comprension pa e situacion cu a surgi. Mientrastanto NoticiaCla.com a compronde cu e intencion tabata pa bay parlamento cu e lista di firma, y tambe a compronde cu minister di transporte Otmar Oduber lo atende cu nan. No ta confirma si esey ta awe mes, of riba un fecha despues.

Den un carta dirigi pa e minister responsabel pa parkeermeter (Otmar Oduber), e trahadonan ta pidi pa consideracion pa nan y pa trece cambionan den e concepto. Nan ta cita varios motibo pa cual nan no ta contento actualmente cu e situacion, pero mes momento ta mustra cu nan no ta contra e proyecto total. Solamente cu mester adapta e proyecto di tal forma cu e ta beneficia e grupo di trahadonan cu ta wordo afecta. Entre e puntonan di preocupacion, ta e seguridad cu no tin pa un grupo cu no por a haya permiso di parkeer serca di e lugar di trabou. For di momento cu nan a keda confronta cu e parkeermeter, hopi trahado a haya nan mes den varios situacion fastioso caba. Den e carta pa e mandatario, nan ta bin cu algun keho specifico, pero tambe sugerencia con por remedia e situacion pa tur hende por keda contento. A mustra cu nan ta representa 550 trahado, pero ta conta cu sosten di tur 750, y tambe cu gerencia cu a sostene y apoya e trahadonan pa nan por a tene e accion di firma y entrega esaki na e mandatario

LEAVE A REPLY

Please enter your comment!
Please enter your name here