Ex sindicalista y mediador di Gobierno, Anselmo Pontilius ta mira cu nos ta cerando un aña 2017 cu retonan pendiente pa 2018. Tin un situacion den cual e ta mira particularmente cu e problemanan social a afecta, conmove y shock nos comunidad, specialmente cu e fayecimento di e dos criaturanan, Rishandroh y Eugene.

E mester ta un di e motibonan principal den cual gobierno y tur instancia, ya cu gobierno so no por hacie, lo concentra  riba e problemanan di caracter social den nos pais pa 2018. “Mi ta kere cu nos ta na tempo pa atende cu esaki, y esey mester ta e reto principal.”

Situacion laboral
Pero na mesun momento mester concentra riba situacion laboral. Ta importante pa tin claridad riba refineria y con e mercado laboral lo wordo afecta si no tin cumplimento di e acuerdo akinan. Sr. Pontilius ta positivo y convenci cu nan lo sa di supera e parti di retraso di trabou den e refineria. Pero esaki no ta kita cu e asunto aki ta un punto hopi importante. E gobierno di coalicion (MEP-POR-RED)  a caba di sinta recientemente y ta natural cu nan mester di tempo pa reestablece e linea di trabou.

Otro tema importante cu ta andando tin di haber cu gobierno ta reuniendo cu diferente instancia. E ta haya cu si tin un tipo di dialogo entre nan riba temanan general lo ta importante. Logico cu mester duna oportunidad na e ministernan di e gabinete actual Wever-Croes por establece e maneho y comparti esaki cu e gremionan. Ya cu pa atende e problema social dificilmente gobierno por su so, y mas hopi bo ta envolvi e gremionan, posiblemente miho solucion bo haya, segun sr. Pontilius.

Mediador di Gobierno ta kere cu riba tereno di mercado laboral ta keda un pregunta cu mester haya contesta riba e trahadonan di 55 y 60 aña bay ariba, con mester atende cu nan.  Tin un cantidad di hende cu kier keda riba e proceso laboral pa motibo di e cambio di edad di pensioen, ya cu nan no ta baha cu pensioen mas na 60 aña. Con e sector priva y publico ta bay haya otro riba e punto aki y tambe riba otronan di  diferente aspecto.

Cupo di trabou y tecnologia
Igualmente si nos ta mira rond di mundo tin diferente trabou cu ta bay disparce, ya sea pa motibo di avance di tecnologia y cambionan cu tin cu empresanan ta kies pa traha cu menos hende, e mediador ta di opinion. Riba e punto aki tambe nos mester reflexiona, con e desaroyo aki lo afecta e mercado laboral di Aruba. Pero con nos lo bay atende cu e asunto aki tambe.

Mediador di Gobierno a indica cu den nan nota cu nan a entrega na minister di Labor, nan a señala diferente puntonan, entre nan e impacto di e avance tecnologico cu nan ta haya cu ta importante pa gobierno tene cuenta cu nan. “Pa motibo di no laga cu e desaroyo aki sorprende nos.”

E ta haya cu rond mundo nos por mira cu un cantidad di cupo di trabou ta disparce. Pero na mesun momento con nos ta para pa prepara e hendenan cu eventualmente lo ta cay den e grupo ey por bay otro sector. Y con nos ta re training  nan pa haya trabou riba otro cupo di trabou cu ta wordo habri.

Tambe recientemente minister di Husticia encarga cu maneho di admision di hende di afo a anuncia cambionan riba e tereno aki, y otronan cu ta na caminda. E ta haya interesante con e sector priva y gobierno ta bay atende cu otro riba e parti aki, si berdaderamente e mercado laboral mester di hopi hende si of no. Ya cu ta conoci cu si e refineria ta drenta den un proceso di trabou acelera lo bay tin mester di trece trahadonan di afo.

Segun mediador di Gobierno, tur e puntonan aki ta cosnan pa tene cuenta cu nan entrante 2018.