Siman pasa a bira conoci e noticia cu e contratista Mericano cu tabata encarga cu e proyecto di renobacion y expansion di Dr. Horacio Oduber Hospital a bandona e proyecto y no lo sigui mas. Esaki ta bati alarma pa mandatarionan di Aruba cu aworaki ta en busca di un solucion pa por finalisa e proyecto aki, cu a tarda mas, y a costa hopi mas, di loke cu a spera.
E historia di renobacion di hospital ta yena cu storia di fracaso, mal maneho y mas cu tur cos, costo aumentando cu cada incidente. Fuera di e prijs inicial mas halto, tabatin por ehempel henter e storia di e salanan di operacion cu a ‘lubida’ di pone den e plan di renobacion. Na caminda a tuma lugar algun otro incidente, entre otro e ‘inundacion’ cu a tuma lugar den e parti di emergencia despues di awasero fuerte. Un tubo di awa cu tabata baha di e dak halto a kibra, muy probablemente a base di un fayo di construccion. Y aworaki tin e asunto di e contratista cu a bandona e proyecto.
Parlamentario Arthur Vallejo, reaccionando ariba e noticia aki, a indica durante conferencia di prensa cu e ta urgi Minister di Salubirdad Publico, Dangui Oduber pa bin cu un partido evaluador. Pero di otro banda tin otro opcion, un ‘parlementaire enquête’ – cu no ta un ‘encuesta’ sino un investigacion, cu ta encera un comision di investigacion di experto, pero cu compromiso directo di un mayoria di parlamento.
Mirando e severidad di e caso aki, Bon Dia Aruba a tuma contacto cu Minister Dangui Oduber pa puntra
pakico no ta habri un investigacion riba iniciativa di parlamento den e asunto di e contratista cu a bay y si e tin obhecion contra un investigacion asina, ‘parlementaire enquete’. Pero no a ricibi un respuesta for di e minister encarga.
Na mesun momento a puntra e minister tocante un otro asunto, cu ta trata saca muestra di sanger na dokternan di cas y e gasto cu esaki ta trece cune. Pueblo ta paga pa laboratorio priva y di hospital plus pa e colecta di sanger na despacho di dokter di cas. A puntra e minister pakico no ta scoge pa baha gasto den e aspecto aki si gasto di laboratorio no ta baha y e dokternan ta dedica presupuesto na e servicio aki, cu hopi hende no ta haci uso di dje.
