Dialuna merdia, Director di Utilities Sr. Anthony Rojer a elabora riba e proceso di “Expression of Interest” pa e Parke di Molina di Biento na Rincon. Presente na e ocasion aki tabata Director di Web Aruba NV, señor Alfredo Koolman, y señor Albertico Koolman, Operations Manager di Elmar.
Den un comunicado di prensa, a indica cu manera ta conoci, como grupo di utilidad na Aruba a yega na un Expression of Interest (EOI), cual a invita expertonan den mundo energetico pa por expresa nan interes pa haci oferta di energia. Utilities Group a publica un invitacion dia 15 di Augustus, 2022 invitando tur compania di energia interesa, pa aplica pa maneha e proyecto di Parke di Molina di Bientona Rincon.
Den cuadro di transparencia, e proceso a wordo traslada pa e oficina di “NewLeaf Notary” cu a encarga cu maneho di e proceso aki.
Ayera merdia Sra. Notario Chamila Tromp na oficina di NewLeaf Notary a habri publicamente tur envelop (“dropbox link)” di e proponentenan. Tabata tin un total di 28 participante di cual 22 a paga e tarifa di inscripcion $500 pa por continua cu e siguiente stap nan y 12 a completa e proceso defini den e invitacion cu Utilities Group a publica.
Despues cu Notaris a haci su evaluacion di tur e aplicantenan, lo manda e resultado di e companianan cu a registra y a completa cu un propuesta.
Na su turno Utilities Group, cu ta Web Aruba, Elmar y Utilities Aruba lo haci nan evaluacion y nan lo wordo asisti pa un hunta di consehero consistiendo di representantenan legal, tecnico y sostenibel (Advisory Board). Conhuntamente Utilities Group lo tuma un decision di cual compania nan lo continua pa e siguiente fase cu ta e “Request for Proposal”.
E parke di Molina di Biento lo reduci e costo di electricidad pero na mes momento ta un necesidad pa combati cambio climatico of “Global Warming”, kentamento global. Un di dos Parke di Molina lo garantisa un bon tarifa, confiabilidad y sostenibilidad pa cu coriente den un medio ambiente mas sano pa nos comunidad.
