Proceso nombramento gobernador ta core robes…Mester siña respeta regla

Apenas algun dia pasa nos a atende den e editorial aki e asunto di nombramento di Gobernador. Nos no a spera ni anticipa cu un par di dia despues ya caba nos ta den un incidente innecesario y tumultuoso den e proceso aki. Diabierna 11 di maart ainda nos a referi den un articulo dedica na tur e speculacionnan cu tin tocante e sucesor di e actual Gobernador. Eyden  nos a adverti cu e proceso aki mester por tuma luga den un ambiente trankilo y confidencial. Pa cita textualmente:”Candidatura y seleccion final ta algo cu ta tuma luga den discrecion y no den luz publico y esey pa bon motibo. Laga nos spera cu esnan cu ta dicidi, lo actua cu sabiduria.” Esaki pa enfatisa cu na ningun momento den e editorial aki nos lo bay den direccion di speculacion y comentario previo tocante cual candidato cu ta, tanten no tin un Gobernador nombra oficialmente. 

Esey  no ta kita cu tur otro medio di comunicacion ta liber pa vocifera loke nan ta desea tocante e asunto aki; esey ta libertad di expresion. Esnan cu mester actua cu sabiduria y discrecion, ta esnan cu ta hunga un papel den e proceso di selecciona, screen y nombra un Gobernador. Ta nan mester sa kico nan por comunica na prensa y kico no. E asunto a cuminsa cu Prome Ministro mes a haya ta bon pa lanta ‘een tipje van de sluier’ manera ta bisa na Hulandes, divulgando e noticia cu tin un candidato di gobierno y cu e candidato ta masculino y e no ta un politico.  Y ta aki caba algun cos a cuminsa cana robes. En bes di calma e speculacionnan, solamente nan a bira mas intenso, comentando riba tur e posibel candidatonan cu si of no ta cay den e categoria di masculino y no politico.

Despues a leak, contra boluntad of a proposito, esey nos ta laga memey,  e informacion cu e candidato aproba pa Conseho di Ministro ta e actual ministro encarga cu Finanzas. Aunke den exterior, tin medio di comunicacion local cu a logra comunica cu e ministro, pa tende di su mes persona cu en berdad e ta candidato di gobierno di Aruba, pero cu el a pone condicion cu e ta desea di termina su trabao pa loke ta presupuesto 2017. Como cu e presupuesto mester ta entrega na Parlamento pa mas tarda 1 di september, esey lo significa cu mester busca un solucion pa e periodo intermedio, segun mayoria di comentario.

Pero, no a pensa riba e posibilidad cu gobierno di Reino por dicidi pa nombra e actual Gobernador tambe pa e periodo cu nan ta haya ta bon. Y mirando tur e turbulencia di e momento aki, lo no ta imposibel cu gobierno di Reino ta dicidi cu ta extende e nombramento di nos actual Gobernador pa mas tempo, te cu tur cos calma atrobe, y por cuminsa un proceso discreto y corecto atrobe, manera mester ta.

E motibo principal pa esaki ta cu e mencion di e actual candidato den e fase aki, unda segun declaracion di gobierno Hulandes, no a ni papia conhuntamente ainda riba su candidatura, te pa por yega na un proposicion conhunto, ta pone cu nenga of aproba, semper e ta bay mustra manera un decision forsa. Si gobierno di Hulanda awor bisa no contra e candidato proponi, e ta mustra malo pasobra nan ta rechasando e candidato formal di gobierno di Aruba. Y si nan aproba, e ta mustra malo pasobra ta aparenta cu nan a bay na amen di gobierno di Aruba, loke pa nan cara no ta bon tampoco.

Ta p’esey nos anterior enfasis riba discrecion den e proceso aki, pasobra tur dos gobierno den e negociacion mester tin un ‘way out’ diplomatico, sin perde cara, ora ta propone candidato cu pa e otro no ta aceptabel, pa cualkier motibo cu esaki por tin.

Den tur e turbulencia aki, nos ta desea di laga bon cla cu na ningun momento nos ta comenta riba e aspectonan positivo of negativo di e persona Bermudez como candidato. Loke nos ta observa ta cu esaki no ta e manera cu e nombramento di cualkier persona mester bay, ya cu e erornan cometi aki na Aruba, consciente o inconsciente, boluntario  o a proposito, a hinca gobierno di Hulanda den un posicion unda practicamente nan no por haci nada otro cu pone orden den e asunto aki y hiba e proceso al pie de la letra.

Nos no mester lubida cu e Gobernador no ta representa Aruba dilanti di Rey, pero ta e representante di e Rey na Aruba y no ta anos aki ta nombre. Den e proceso di nombramento tin un cierto consulta ta tuma luga, pero no ta significa cu mester nombra automaticamente e candidato proponi pa gobierno di Aruba, ni mucho menos gobierno di Aruba ta dicidi ken ta e siguiente funcionario den e puesto aki. E miho alternativa den e situacion incomodo crea awor por ta un pausa momentaneo y cuminsa un proceso nobo di consulta (discreto), respetando e reglanan al caso.