Seis baby a nace ultimo dia di aña
Dr. Horacio E. Oduber Hospital ta anuncia cu e prome baby di aña 2018 ta un mucha homber y a haya e nomber Dwayne Aiden Anderson Woods. Baby Dwayne a nace 04:59am, segun e relato cu nos a haya di Hospital.
Dwayne ta e prome yiu di Dacey Woods y e tin un peso di 2735 gram y un largura di 47 cm. Baby Dwayne a nace di un parto natural via partera Wies Haverkamp di Cas di Partera.
E mama no a spera cu e baby lo a nace asina pronto, pasobra e tabata di nace dia 10 di januari. Dacey tabata celebrando e cambio di aña na cas y a cuminsa haya dolor despues di tiro. Segun e relato di Hospital, e parto a bay bon y Dacey ta hopi contento y masha orguyoso di por habri aña 2018 cu un miembro nobo den famia.
E ultimo dia di aña 2017 a nace un total di 6 baby di cual 4 tabata mucha homber y 2 mucha muhe. E ultimo baby di aña 2017 tabata un mucha homber cu a nace 1:50 di merdia via di un parto natural via Cas di Partera. E mama tabata sinti bon y por a bay cas pa celebra e cambio di aña hunto cu su baby.
“Un danki grandi ta bay na zuster Arends y zuster Vackier na departamento di Maternidad. Pabien Aruba cu Dwayne, e prome baby di aña!”
