E inflacion pa luna di december na Venezuela a alcansa 81%, loke a hiba e pais na cera aña cu un inflacion acumula di mas di 2.375%, segun e calculo preliminar di e firma di analisis financiero Ecoanalítica.
Segun e director, e economista Asdrúbal Oliveros, e inflacion acumula di 2016 tabata 525%.
Gobierno y Banco Central Venezolano no ta publica dato tocante inflacion y otro indicador economico desde 2015, motibo pa cual ta consultorio priva manera Ecoanalítica o Econométrica ta esunnan cu ta midi e fenomenonan aki, di cual tambe nan ta ofrece calculacion na Parlamento, unico poder di estado den man di oposicion.
Segun dato di e fuentenan aki, Venezuela a drenta tecnicamente den hiperinflacion algun siman atras, superando e limite di e 50% di inflacion mensual.
Den un informe presenta na Comision di Balor di Merca,rekeri pa por comercialisa bono na e pais ey, y publica na december pa e institucion Mericano aki, e gobierno Chavista a calcula e caida di su Producto Interno Bruto (PIB) na 2016 na 16,5%, y ta admiti un inflacion acumula di 274.4% pa aña 2017.
Segun dato di Fondo Monetario Internacional (IMF), Venezuela ta e unico pais na mundo cu ta cera 2017 cu un inflacion anual di cuatro cifra.
Tras di Venezuela segun IMF ta sigui Sudan di Sur cu un inflacion di 111%. E siguiente riba e lista ta Republica Democratico di Congo cu un inflacion di 50%.
E causanan di e hiperinflacion ta e inyeccion descontrola di placa den e sistema y e caida di produccion di bienes, cu ta conduci na un desekilibrio entre e abundancia di placa y e escasez di oferta di producto.
Desde su yegada na poder na 1999, gobierno Chavista a aumenta sueldo mas di 40 biaha, mientras miles di empresa a ser nacionalisa o a cera nan porta.
Den e siman di 15 pa 22 di december so caba, Banco Central a aumenta e base monetario cu 24,15%.
Gobierno Venezolano ta papia di un inflacion induci pa Merca, e sistema financiero internacional, oposicion y algun empresario y comerciante local cu nan ta acusa di “speculacion.”
