ORANJESTAD – Recien, prome minister Evelyn Wever-Croes a bisa cu

“e situacion na nos pais bisiña Venezuela ta sigui tenso y confuso. Nos ta sigui e situacion di cerca pa hunto cu Marina Real, cu autoridadnan local y den coordinacion cu Corsou y Boneiro, ta miho prepara posibel”. 

“Mientras tanto pa loke ta e situacion na Venezuela mes, Corsou ta preparando pa fungi como ‘hub’ pa ayudo humanitario na Venezuela. Mi ta bolbe enfatisa cu ni Aruba ni Reino lo ta envolvi den accion military”.

Refineria
Pa loke ta e refineria na Aruba, e mandatario a expresa di ta hopi preocupa. Diahuebs ultimo ehecutivonan di gobierno y di Citgo a reuni. Citgo a anuncia cu debi na ultimo sancionnan cu Merca a impone riba Venezuela, nan lo mester retira varios trahado riba termino corto.

“Mas cu claro nos no ta acepta esaki. Citgo tin un obligacion cu trahadonan y mester cumpli cu esey. Gobierno lo no coopera cu e retironan aki. Nos gobierno mesora a pone contacto cu ehecutivonan nobo di e refineria pa evita esaki mas tanto posibel. Lamentablemente nos no tin tur cos den nos man, debi na e situacion tenso y confuso na Venezuela. Sinembargo nos lo sigui haci tur esfuerso posibel pa evita cu trahadonan local perde trabou, y si nan perde trabou mes, a traves di instancia gubernamental lo intermedia pa nan haya trabou cu prioridad.

Ayera un grupo di trahado a reuni na YMCA San Nicolas cu contratistanan y dos abogado local. E trahadonan ta preocupa pa motibo cu no tin placa pa asina paga nan salarionan. Ta asina cu e contratistanan tin algun luna caba dunando servicio na Citgo, pero Citgo no ta pagando. Ayera trahadonan a wordo manda cas, nan badge a wordo cera desde ayera. Ta asina cu e empleadonan no a cobra un salario, e contratistanan kier paga, pero nan no a ricibi entrada di Citgo ainda.

E refineria ta strategico pa nos y pa Venezuela, pero e circunstancianan ta complica memey di e desaroyonan geopolitico y interesnan di varios otro pais. Nos meta ta pa mantene continuacion di e refineria y henter nos gabinete ta envolvi den esaki. Nos a bis’e den pasado, y mi ta ripiti: hasta si tin solamente 1% di posibilidad pa habri e refineria, nos lo lucha pa logra habri e refineria. Ta bon pa bisa si cu locual nos ta bibando awor cu e refineria no ta nada cu nos no tabata sa desde principio cu nos a drenta gobernacion.

Gobierno anterior lamentablemente na luga di negocia cu interes di pais Aruba den mente, a negocia cu otro interesnan den mente. A asocia nan mes cu hendenan dudoso cu ta envolve nan mes den practicanan dudoso. Aruba lo carga e fama di tabata habri pa hendenan manera Carvajal y Rincon. Con caro esaki lo costa nos, ainda nos mester haya sa.

Y awe nos ta sinta cu e consecuencianan: un acuerdo cera cu tin un pilar di nos economia practicamente como rehen. Den cual no a tene cuenta cu interes di Aruba sino cu interes di algun individuo. Un refineria cu no a habri ainda.

Ta p’esey desde e principio di nos gobernacion, nos a duna e problematica aki hopi atencion.

Nos a reuni cu ehecutivonan di Citgo na varios ocasion desde januari aña pasa. Na februari Citgo a anuncia e slow down y cu lo a retira trahado. Nos a reuni cu e minister encarga cu energia, sr. Quevedo, na augustus.

 

Nos a bay Washington na mas di un ocasion pa atende e tema aki cu State Department y purba interveni cu OFAC pa cu e sancionnan. Sinembargo, sin resultado te ainda. Esaki no ta debi na nos, na Aruba, sino e ta debi na e partner inconfiabel den e contract. E partner cu gobierno anterior a informa nos cu tabata confiabel y cu hasta Hulanda a aproba. Awor ta resulta cu esey no tabata berdad.

 

Sinembargo, ban enfoca riba e posibilidadnan nos dilanti. Tin un cambio na horizonte cu cambio di dirigentenan di Citgo, manera anuncia e siman aki, pasobra tin un chens cu autoridadnan Mericano tin mas confiansa den nan y lo lanta e sancionnan. Nos a pone contactonan caba y nos ta haciendo tur esfuerso pa logra cu e sancionnan por wordo lanta y asina nos por haya un partner serio pa rehabilita e refineria.

 

Manera cu mi a bisa, e problemanan cu e refineria no a cuminsa awor y e situacion aki no ta nobo. Nos a pasa aden caba. Mescos cu e biahanan den pasado, nos no lo sinta man crusa. nos a lucha y surpasa e desafionan. Y nos lo bolbe haci mescos, mi tin confiansa cu nos lo surpasa esaki atrobe.