Prome minister Eman lo reuni cu minister Oduber mañan riba su ultimatum prome cu e ta bay duna un comentario mas profundo.
Aki bou por lesa e relato oficial:
Den un declaracion duna na prensa prome minister Eman a enfatisa cu e ta haya importante pa papia personalmente cu su amigo y colega minister Oduber prome cu duna un reaccion. Prome minister Eman, kende tabata den un retreat cu demas ministernan, a sali pa duna un declaracion cortico na prensa y a bisa nan cu prome cu minister Oduber a bay Gobernador Refunjol, el a papia cu ne.
“Den e combersacion cu minister Oduber mi a sinti cu tabatin hopi emocion. Mi a palabra cu ne cu mi lo tin un otro combersacion cu ne prome cu mi por duna mas comentario riba contenido di loke el a expresa. Aki nos ta papia di un periodo di añanan di amistad, di colegialidad, di luchanan hunto pa duna awor comentarionan cu por wordo interpreta di diferente forma.” Prome minister Eman a reitera cu nan ta hunto den un organisacion politico pa añanan largo y trahando den gobierno hunto cu resultadonan hopi grandi y positivo pa pais Aruba. “Mi ta sinti awor cu ta mas na su lugar pa tin un bon combersacion entre mi persona cu minister Oduber prome cu mi duna cualkier comentario riba comentario.” Eman na mas di un occasion a stress cu e combersacion cu e ta bay tene cu Minister Oduber ta importante prome cualkier otro declaracion wordo haci. “Minister Oduber merece esey. E trabounan cu nos ta haciendo pa nos pais y nan importancia merece un proceso serio.”
Na final Eman a bisa cu su gobierno ta un ekipo. Mester ta asina tambe pa por logra e resultadonan cu un pais manera Aruba mester. Riba varios pregunta di prensa pa duna un declaracion riba loke minister Oduber a bisa Eman a keda para’riba cu sin e combersacion cu e ta bay tene cu minister Oduber no ta corecto pa haci cierto expresionnan. “E no ta cuadra tampoco cu e amistad y colegialidad cu nos tin di hopi aña.”
