Recientemente, prome minister Evelyn Wever-Croes a reacciona riba un comunicado di prensa di parlamentario independiente, Gerlien Croes, tocante e cambio cu a haci den Presupuesto Complementario 2, den cual e parlamentario a bisa cu esaki mester a bay Raad van Advies prome cu e yega Parlamento.

Diaranson di siman pasa, Parlamentario Croes a entrega un carta na Su Excelencia Gobernador Alfonso Boekhoudt, den cual segun un comunicado di prensa, “ta denuncia e ocasion mas reciente den cual Gabinete Wever-Croes II ta viola e reglanan di precesonan di ley ancra den nos constitucion.”

Parlamentario independiente mr. drs. Ryçond Santos do Nascimento a compaña Croes ya cu e tambe ta para tras di e mesun un ponencia y ta co-firmante di e documento.

E parlamentario a splica cu siman pasa, “a manda un bundel di ley relaciona cu entre otro cambio di presupuesto di DOW pa 2023, sin cu a laga tur e leynan aki pasa na Raad van Advies pa su evaluacion y conseho. Den e bundel presenta tin e Presupuesto Complementario di Pais Aruba, e Presupuesto di Parlamento di Aruba y un cambio riba presupuesto di Departamento di Obranan Publico (DOW). Ta den e ultimo aki, a core hinca un suma na ultimo ora, sin cu el a cana e procedura legal manera cu si nan a laga haci cu e otro dos leynan menciona.”

Croes a continua splicando cu “mas specificamente, ta trata di un cambio den e presupuesto di 2023 pa DOW caminda ta bin cu 1.2 miyon florin adicional pa atende asunto di insinerado na Parkietenbos y mantencion di speelplaatsen. Ley ta prescribi cu un proceso di cambio di ley asina mester inclui conseho di Raad van Advies, esey no a sucede.” Pa e motibo aki, e dos parlamentario independiente a entrega nan carta na Gobernador di Aruba.

Prome minister Wever-Croes a reacciona bisando cu “segun Parlamentario Croes, den e version cu a bay Staten a hinca aden un cambio di e LV Begroting 2023 di DOW pa his’e cu e 1.2 miyon florin pa por drecha e incinerator y asfalta 2 speelplaats. Mientras cu e version di e Presupuesto Complementario 2 cu a bay Raad van Advies no tabatin e cambio ey. Den e caso aki, tanto Parlamentario Gerlien Croes como Parlamentario Ryçond Santos do Nascimento ta referi na Constitucion.”

Den su comunicado, Prome Minister Evelyn Wever-Croes a duna di conoce cu Gobierno di Aruba a actua na un manera responsabel y a manda e Presupuesto Complementario 2 pa Raad van Advies. Premier Wever-Croes a indica cu e cambio aki cu a wordo haci den e Presupuesto Complementario 2, no mester a bay Raad van Advies. Esaki, segun e prome mandatario di nos pais, ta conforme ley. “Gobierno por adapta e presupuesto di DOW cu a pasa Januari 2023 cu un ley di Presupuesto Complementario sin cu esaki bay back Raad van Advies. Den e tipo di discusionnan asina ta hopi importante pa contesta e siguiente pregunta: ta trata di un ‘ingrijpende wijziging’ of no.”

Segun Wever-Croes, si ta un cambio substancial, cu consecuencianan financiero of huridico of estatal hopi grave, e ta wordo considera como “ingrijpende wijziging” y e ora e cambio mester bay back Raad van Advies segun Articulo 22 di Landsverordening Raad van Advies 2022 (y no Constitucion). Pero den e caso specifico aki, segun Prome Minister, no ta trata di un “ingrijpende wijziging”. E suma en cuestion compara cu e suma total di e Presupuesto Complementario 2 y presupuesto 2023 mes ta indica esey caba. “Cu nos a haci un cambio den un ley (e Begroting DOW2023), riba su mes no ta cambia e conclusion. E cambio no ta “ingrijpend” manera nan ta insinua. Ta trabaonan cu DOW ta haci caba y ta mas bien un cambio administrativo. Ta 1.2 miyon pa haci e trabaonan di DOW y ta presupuesto di Land Aruba ta aloca e fondonan ey pa DOW”, Prome Minister a indica.

 

Prome Minister a remarca cu no por sigui e linea di Parlamentarionan Gerlien y Ryçond y manda tur cambio Raad van Advies. Esaki lo stroba e proceso di legislacion innecesariamente. Mientras aki ta trata di presupuestonan cu ta basa riba “budgetrecht” di Staten, e derecho mas bieu y importante di un Parlamento, no di un Raad van Advies, segun e ta conclui.