Durante un conferencia di prensa, Prome Minister Evelyn Wever-Croes a anuncia cu a frontera cu Venezuela ta keda cera. Tambe el a duna comentario tocante e situacion cu Aruba Airlines y aeropuerto chikito.
Venezuela a cera e frontera cu Aruba for di februari. Nan a dicidi habri esaki na mei, mas sinembargo, Aruba a dicidi di cera esaki di nobo pa e situacion di fluho di persona, y ademas pasobra Venezuela a tene frontera cera cu Corsou y Bonaire.
E mandatario a splica cu tin reunion cada dos siman cu Minister di Boneiro y Corsou pa asina ta riba e mesun liña di posicion. Esaki ta cu nan tambe lo mantene nan fronteranan cera cu e pais Latino Americano.
“Nos no por tene frontera cera eternamente, pero tin motibo suficiente pa tene cera temporalmente, pa purba regla locual tin cu wordo regla pa ora cu tin di habri frontera ta prepara”, el a expresa.
Aruba ta trahando riba e modelo ESTA, pa esunnan cu ta bin for di Venezuela mester aplica online. Asina tin miho control ken y cuanto ta biniendo Aruba, ‘pa ta prepara den esey’. Apart di esey, tambe ta poniendo forsa na e control migratorio, di costa y otro varios accion pa evita impacto cu fluho grandi di migrante lo causa na Aruba.
Wever-Croes a bisa cu mientras cu e ta compronde e situacion, no por yuda mas. “Aruba humilde a duna su parti, awo ta momento pa otro pais duna nan parti”, el a expresa.
Pa e tema di Aruba Airlines, hunto cu aeropuerto chikito, a dirigi un carta pa gobierno. Den esaki nan a splica cu e ceramento di frontera a causa impacto grandi riba nan negoshi. Aruba Airlines ta un compania cu ta duna trabou na 200 persona, mayoria di nan ta hende local.
Nan a pidi pa un vuelo di transito, caminda persona di Venezuela por bay Merca via Aruba. Si no wordo haci asina, e compania no lo sobrevivi. Wever-Croes a remarca cu por haci uzo di Aruba pa transito, pero na Aruba ningun hende por keda si ta bin di Venezuela. Nan tin cu keda den avion pa bay stret Merca.
“E peticion a wordo haci y nos tin’e den consideracion. Aeropuerto chikito tambe nos ta deliberando, pero tin cu sa cu nos no por habri frontera. Ta trahando con nos por haci den e situacion pa no yega un punto cu e compania no por sobrevivi”, el a expresa.
Sinembargo, no por duna ‘cada rato excepcion’, sino e frontera ta bira debil. E preocupacion actual ta pa e impacto cu e crisis di Venezuela tin riba Aruba. Un situacion delicado y cu mester ta cauteloso den dje.
Wever-Croes a finalisa ta splica cu no lo habri frontera, pero e peticion ta den consideracion cu varios otro compania, pa mira con por yega na un solucion of keda cla cu opcion di ESTA, entre otro, pa evalua si lo habri e frontera.
