E bloke di sindicatonan di sector publico (SIMAR, SEPPA, TOPA, SPA y SADA a dicidi di bolbe manda ayera mes un carta pa gobierno cu tin como punto central pa gobierno bin cu un contra proposicion riba loke nan ta pidiendo di indexering. Nan ta pidiendo 3.6% pa compensa e perdida di poder di compra di e trahadonan di sector publico.

Nan a dicidi e carta aki despues cu nan a ricibi un carta cu fecha 26 di juni ultimo, como contesta na otro carta di 20 di juni ultimo cu e bloke sindical a yega di manda pa Minister di Economia y Finansa, Xiomara Maduro. Pero den e ultimo carta cu gobierno a manda pa e bloke sindical, no tabatin niun contra proposicion.

Presidente di SADA, Edward Maduro, kende ta e vocero di e bloke sindical, a bisa enfaticamente cu ningun momento gobierno a bisa den su ultimo carta cu nan no lo duna indexering of niun tipo di compensacion. “Esey ta e caminda cu nos ta! Gobierno ta duna di conoce cu nan ta respeta cu tin di haci cu inflacion, y cu tabatin perdida di forsa di compra,” Maduro a bisa.

E bloke sindical ta pidiendo 3.6% di indexering cu ta nifica un suma di alrededor di 20 miyon florin. Nan tin speransa cu despues di e serie di reunion cu nan ta bin sosteniendo cu gobierno, nan por yega na un entendimento y cu e suma aki di indexering lo wordo hinca den e presupuesto 2020 cu mester wordo entrega dia 1 di september awor. Pues nan ta spera cu prome cu gobierno entrega su presupuesto pa 2020, e asunto di pago di indexering mester wordo regla debidamente. Como informacion adicional, e presupuesto 2020 –segun ley di LAft y e protocol firma cu Hulanda- mester tin un surplus di 0.5%, kier men alrededor di 25 miyon florin.

E bloke sindical di sector publico ta sigui persisti ya cu den tur e reunion gobierno a mustra cu nan ta compronde e parti di e perdida di poder di compra, vooral awor cu ta wordo papia di un inflacion di casi 5%. Ta asina cu gobierno a yega di pidi e bloke sindical aki ‘tempo y espacio’ pa nan por cumpli den nan margen di un manera of otro cu e trahadonan.

Ayera mainta e bloke sindical di sector publico representa pa nan respective dirigentenan a dicidi di bin cu un conferencia di prensa den sede di SIMAR, ya cu despues cu nan por a scucha siman pasa un declaracion di minister Xiomara Maduro, nan ta wak cu e mandatario a duna ‘algun informacion cu no ta cuadra.’

P’esey nan a dicidi di duna nan banda di medaya pa comunidad, pero tambe miembronan, por tin un bista riba kico nan ta haciendo. Den e conferencia aki, sindicalista Maduro a trece un clarificacion y splicacion cu el a cualifica di un manera neutral, rond di discusion di indexering.