16jul, NW, mike eman.jpg

Ainda tin cu acorda riba algun punto cu Valero y ta sinti cu practicamente awor ta den preparacion di e documentonan oficial pa por yega na e acuerdo firma cu e compania petrolero aki, segun prome minister di Aruba, Mike Eman.

 

Valero ta bay pasa pa Aruba e refineria y ta haya tur e facilidadnan di e refineria y hunto cu esey Valero ta bay duna algo di compensacion pa algun trabao cu mester a wordo haci di limpiesa y di otro banda, gobierno di su banda ta release Valero di e obligacion di desmantela e refineria y asina ta haci cu Aruba ta bira doño di e refineria pa bay leas’e cu Citgo. Tur e acuerdonan cu Citgo ta firma caba. Awor falta e acuerdo cu Valero pa traspasa e refineria pa gobierno pa tur e documentacion aki por bay Parlamento di Aruba. Documentacion ta practicamente cla caba. Departamento di legislacion a traha hopi duro pa traha e ley cu ta podera gobierno pa crea e compania di refineria di Aruba pa duna tambe autorisacion di parti di Parlamento pa tur e documentacion cu a firma bao di e condicion cu parlamento aproba esaki, cu e aprobacion ey ta bin . E ora ey tur cos por drenta na vigor y ta premira e ora ey cu den e luna di augustus lo ta den parlamento pa pasa e leynan cu ta necesario, e ora ey por ta na luga di 1 di augustus, 1 di september Citgo lo por cuminsa cu e trabaonan den e refineria.

 

Mirando e desaroyo aki por considera e discusion cu Valero un formalidad legal. No tin nada cu ta pega cu otro, pero asina mes ta discusionnan importante. Pasobra e tin di haber cu Valero ta bay traspasa un assett hopi grandi cu tin un balor enormemente grandi, pero tambe nan kier tin tur siguransa ora cu nan yega na e acuerdo cu gobierno di Aruba cu no ta keda nada habri tampoco pa locual ta nan obligacionnan na Aruba. E ora ey tin cu repasa tur nan obligacionnan pa mira con ta defini nan den nan contract, cual nan tin cu cumpli cun’e, y cual di nan no mester cumpli cun’e, pa motibo cu nan ta traspasa henter e refineria. Esey ta tuma su tempo den e proceso legal pa e wordo defini den e contract. E ta algo basta complica. E ta tuma tambe un trabao huicioso pa haci esey den forma un bon pa nan y bon pa nos.

 

E claim ambiental ta di tempo cu Aruba a tuma refineria di Exxon, e claim mas grandi cu tabata tin di 70 aña di refineria a wordo exonera. Locual Coastal a tuma e tempo ey como responsabilidad, ta unicamente locual nan ta yama e acuerdo di desmantelacion (Dismantlement Agreement), cu un dia nan stop cu operacion, nan tin cu djis haci e tereno limpi te na vloer. E trabao di mas grandi of e balor di mas grandi cu Aruba lo tabata tin na claim ta esun cu tabata riba Exxon y a laga esey bay e tempo ey. Gobierno a busca e temanan na e forma cu nan a mira na e momento ey, ta e cos di mas corecto pa haci y asina Exxon a pasa e refineria pa Aruba, pa 1 dollar, pero a exigi cu nan no ta bay tin ningun obligacion mas cu e medio ambiente cu pa 70 aña largo a traha un industria cu a pone su peso den e area aki, e prome mandatario a menciona.