“Nos ta na mesa den negociacion cu Hulanda. Otro siman nos tin otro reunion. Y asina nos keda full cla nos ta informa. Pero e deliberacionnan ta bayendo bon y mi tin tur confianza cu nos lo logra keda cla.” Esey tabata contesta di Prome Minister mr. Evelyn Wever Croes riba e pregunta di Bon Dia Aruba con leu Aruba ta cu cumplimento di e condicionnan cu Gobierno di Hulanda kier mira, prome cu otorga e siguiente sosten di likides.
Manera ta conoci, ya a postpone e decision dos luna sigui pasobra segun ex Secretario di Estado drs. Raymond Knops, Aruba no a cumpli cu tres condicion specifico, cu ta sera otro protocol riba maneho financiero, y tampoco a pasa e leynan Rijkswet Aruba financieel toezicht, Raft ni e Ley di COHO. Particularmente e protocol nobo tabata un discusion. Aruba tabata kier un protocol cu un duracion di un aña, despues cu esun di 2018 a caduca na 2021. Argumento di Aruba ta cu un protocol sin fecha final ta limita e autoridad di Parlamento di Aruba y riba dje tin CAft cu tin control. Pero Gobierno Hulandes ta hopi determina cu kier un protocol nobo sin un fecha di fin. Tampoco ta cla si Gobierno di Aruba a manda Parlamento e textonan di ley di Raft y di COHO.
Riba e pregunta con leu ta cu e negociacion pa e protocol y si a accepta e leynan Raft y COHO, Prome Minister a bisa cu ainda “nos ta na mesa den negociacion. Asina cu nos ta cla nos lo anuncia.” Sinembargo, no a haya un contesta si Gobierno tin e textonan di e leynan y ki tempo lo manda esakinan pa Parlamento cu ta parti di e condicionnan pa Aruba por haya e sosten di likides.
E reunion di Conseho di Minister di Reino riba e tema ta tuma luga na Februari awor.
