Nos por a pensa cu e siman aki ta di sorpresa, pero el a bin di un otro banda. Gobierno di Aruba a logra, o ta logrando, segun Promer Ministro den anuncio oficial via medionan, di haya un o mas prestamo cu ta brinda e posibilidad di cubri e proximo dos lunanan (september, october). Esey no ta cambia e perspectivanan pa resto di aña, pero claramente ta un intento di ‘gana tempo’. E acuerdo cu Hulanda ta keda colga pa algun tempo mas, mientras ta purba logra algo mas den e negociacionnan ey.

Tin un problema cu esey si. Nos por wel di fia placa otro caminda, nos no sa na unda pasobra e informacion ey Promer Ministro, ni cuanto ni pa cual porcentahe, pero esey no ta mas cu un ‘adempauze’ den e situacion cu nos ta aden. Por lo pronto en todo caso por paga salario di empleado publico, subsidio di salario pa sector priva y FASE, esey ta e parti bon di e noticia. Sin embargo esaki no a cambia nada na nos perspectivanan den e proximo lunanan, unda e problema financiero di gobierno ta solamente un di e problemanan grandi cu nos tin, y cu ademas ta un problema grandi pa varios aña nos dilanti.Simplemente bisa, aki dos luna nos ta dilanti e mesun situacion pa loke ta trata Hulanda, ya cu nos no ta mira pakico Hulanda lo cambia su posicion. Nan no ta den e necesidad, nan tin tempo pa warda trankil te ora nos no por warda mas…y bin cu e mesun condicionnan cu nan a pone te awor. Esey ta loke a sucede te awor, sin cu por mira realmente un concesion mayor di banda Hulandes. Di loke nos a haya sa di nos promer mandatario mes, den e diferente briefingnan cu el a duna na parlamento y gremionan, ta parce nos cambio chikito, marginal, di e asuntonan secundario, pero practicamente no a papia di rechaso abierto di e dos leynan di Reino, cu lo mester bira realidad. Por ta cu ya a acepta e parti principal ey caba, y ta negociando riba detayes di e ‘landspakket’? Nos no sa, ainda.

Sin embargo, mester papia di otro asunto importante cu tampoco ta cambia cu e medida di fia placa otro caminda, y esey ta e situacion di Covid-19 cu ta birando rapidamente algo fuera di control. Virusnan tin e mal custumber di nunca puntra con ta para cu situacion financiero, ni cuanto hospital, ICU of otro cama tin. E t’ey simplemente a base di loke nos a permitie di ta. Y den nos caso esaki ta mas cu grave, mientras nos no ta mira un nivel apropia di preocupacion cerca nos autoridadnan. Ademas, pa preocupante cu e cifranan cu nos ta haya tur dia tocante e cantidad di caso nobo y caso activo ta, nan ta refleha esituacion manera e tabata den e dia y simannan nos tras, e no ta facilita nos proyecta nada pa futuro. Den e sentido aki, pa bon y profesional cu e trabao haci ta mustra, e no ta e tipo di acompañamiento cientifico cu nos mester. Nos no sa kico ta bin pa nos mañan… Como agravante nos no ta mira e medidanan adicional pa yuda frena e propagacion cu na e momento aki ta na casi 1.400 caso activo, mientras apenas un par di dia pasa ainda nos tabata na un poco mas di 1.200 caso. Parce cu nos no ta realisa con grave e situacion ta, mientras nos ta e unico teritorio chikito den Caribe cu ta den e top-10 di e region, luchando pa puesto number 8 cu Bahamas, cu tin 390.000 habitante. Nos situacion compara cu Republica Dominicana, e pais mas golpea den e region pa coronavirus, ta varios vez mas grave, tuma proporcional segun poblacion. Y, nos no ta mira tanto cambio. Por ehemplo, ta haci falta un control efectivo riba lugarnan cu por tin aglomeracion di hende, sea cu ta supermercado o bar/restaurant.

Y kico esaki tin di haci cu nos situacion en general? Tur cos. Si cos sigui asina, y nos no ta domina e epidemia aki, ta yega un momento cu por sucede dos cos: of nos ta lockdown e isla aki atrobe, of nos mercadonan principal di turismo ta pone nos den categoria cora pa loke ta Covid-19, cu ta e advertencia pa no biaha pa Aruba mes. Y kico nos ta gana cu esey? Absolutamente nada, pero banda di esey no lo tin un mehoracion economico bayendo fin di aña tampoco, loke ta malo pa nos pero malo pa gobierno tambe, pasobra nan proyeccion di entrada lo ta exagera y lo mester di mas ayudo, di Hulanda o fia na cualkier otro lugar. Y si nos tuma e sumanan cu mester ainda pa gobierno cera aña, si e situacion no empeora, ta obvio cu nos no ta bay por fia tur esey, ni localmente, ni riba mercado internacional. Nos lo ta ‘back to square one’ mientras nos ta na e momento aki seis luna caba den e asunto aki. Y ainda nos no tin claridad den e asunto aki, unda nos politiconan ta parce mas preocupa pa nan posicion cu nan ta pa e direccion den cual nos ta bayendo. Sigui skop e bleki…

LEAVE A REPLY

Please enter your comment!
Please enter your name here