E situacion di e barco FSO Nabarima di bandera Venezolano y carga cu 1.3 miyon bari di crudo ta keda un preocupacion pa Aruba y henter nos region. E cantidad di crudo aki ta cinco biaha mas grandi cu e derame di crudo di Exxon Valdez na 1989, segun prensa internacional.

 

Director di departamento di Calamidad di Aruba of Rampen bureau, Rino Hermans a declara na Bon Dia Aruba cu nan ta monitor di cerca e situacion di e barco aki cu ta na peliger, ya cu e por bay zink cerca di e costa di Venezuela y Trinidad and Tobago. “Si esaki zink, e ta forma un peliger pa Aruba, Corsou y Bonaire,” Hermans a declara na e matutino aki

Hermans a laga sa cu FSO Nabarima ta un deposito di crudo flotante. Den e siguiente 48 pa 72 ora nan lo sigui di cerca e desaroyo rond di e barco aki, ya cu e ta keda importante, y Rampen bureau ta keda monitor esaki. Si e ta zink ta depende di e coriente di lama ya cu e crudo por bay ya sea direccion pa ariba of tambe pabou.

Hermans a bisa cu a pesar cu Aruba no ta den alerta ainda, pero si nan ta monitor for di augustus, caminda nan ta sigui e desaroyo di cerca di e deposito flotante aki. Sinembargo for di diasabra ultimo, Rampen bureau a informa tur instancia na Aruba cu nan ta monitor e situacion aki. Esaki ta nifica cu nan lo sigui e desaroyo via satelite y tambe pa medio di noticia rond di e risico aki cu ta halto awor, segun Hermans.

 

Venezuela a saca un barco den direccion di e FSO Nabarima pa wak si nan lo por traspasa e cantidad di 1.3 miyon bari di crudo pa otro barco. Pero nan mester haya aprobacion di gobierno Mericano debi na embargo imponi contra regimen di Nicolas Maduro.

Hermans a recorda e acontecimento cu a tuma luga na aña 2016, caminda 50 mil bari for di Trinidad, a bin afecta nos costa Norte, despues di 3 pa 4 siman

E situacion ta cu for di final di augustus esun abordo di e barco a raporta un problema leakmento interno den e camber di motor. A pesar di nan esfuerso pa contene e leakmento aki, esaki no tabata posibel. Trinidad & Tobago a raporta e problema aki, ya cu e barco ta den su area y e ta representa un peliger pa su costa. Pero Venezuela no a duna aprobacion pa nan yuda contene e situacion di peliger aki. Pero siman pasa un grupo di medio ambientalista “Amor pa Bida Maritimo,” a saca un potret pa denuncia e situacion aki mundialmente.

Hermans a agrega cu nan ta keda monitor e situacion di e di e barco FSO Nabarima den transcurso di e proximo 72 ora, ya cu nan ta oranan crucial pa full e region Caribe. Trinidad y Venezuela ta esunnan mas cerca di e deposito flotante aki.

E expectativa ta sinta riba si Merca ta duna aprobacion pa nan pomp e crudo y mand’e pa otro barco pa minimalisa e riesgo di un derame cu lo bira uno desastroso, muy specialmente pa medio ambiente marino. Tur dos barco ta bao embargo a base di e sancion cu gobierno Mericano a pone riba Venezuela. A pesar cu nan ta den awa teritorial Venezolano, pero e barconan Merca tin sancion riba nan.