Trahado social di fundacion Rancho, Ginelly Quandt ta anuncia cu e proyecto cu nan ta desaroya, esta “Adopta un hanchi” a cuminsa caba.
E hoben Ginelly Quandt a declara cu pa medio di e proyecto aki nan kier pa e companianan y organisacionnan por compromete nan mes den e mantencion y conservacion di e bario di Rancho. P’esey nan a bin cu e nomber “Adopta un Alley” cu na Papiamento crioyo ta nifica adopta un hanchi, y esey ta loke nan kier pa companianan y organisacionnan local por compromete nan mes den e proyecto aki.
E meta di e proyecto aki ta pa duna e hanchinan den Rancho nan debido atencion, entre nan esunnan pa midi nan balor historico, y asina documenta e historia di e hanchinan aki. Tambe pa informa e publico tocante e historia y futuro di e hanchinan aki.
Nan mester bin urgentemente cu e proyecto aki ya cu e hanchinan di rancho ta mustra descuida pa motibo di sushi, iluminacion pober, y hopi biaha ta ilegalmente cera pa e habitantenan. Esaki ta haci cu lamentablemente e hanchinan aki cu un gran balor historico cultural, no ta atractivo pa e bishitantenan.
E bario di Rancho no tin conexion pasando traves di e cayanan. Cu e proyecto aki lo cambia e spiraal di un bario deteriora ora cu Rancho pa medionan di nan hanchinan cu ta e perlanan di su identidad, lo trece conexion bek cu Schoenerhaven.
E proyecto “Adopta un Hanchi” lo facilita e ruta di cana den e hanchinan, y tambe den e parti nobo cu lo bin den cuadro di e plan di infrastructura y cultural cu ta biniendo pa mustra e calidad y potencial di Rancho. E ta un bario cu un identidad propio, un bario historico di piscado yen di bida conecta cu waf.
Fundacion Rancho ta trahando hunto cu Feria Social y CEDE Aruba den e prome fase di e proyecto aki. El a laga sa cu bou e capa di Feria Social cu ta cuminsa den luna aki di augustus ta wordo envolvi e hobennan coach y boluntarionan cu lo colabora cu e proyecto aki.
Esunnan interesa pa sa mas di e proyecto aki libremente nan por consulta Stichting Rancho su website:www.stichtingrancho.org
