Hofi Bario ta un proyecto di agricultura urbano cu Stichting Rancho a bin cune pa promove un mensahe di conscientisacion fundamentalmente riba sostenibilidad alimenticio.

Casi un aña despues cu nan a bin cu e proyecto aki, nan a cuminsa wak e fruta di e simia planta den e consenshi colectivo. Ginelly Quant, kende ta lider di proyecto di e fundacion aki, y tambe un hoben hopi activo den comunidad di Rancho, caminda el a yega di realisa diferente proyecto, specialmente e proyecto di Hofi Bario.

Nan a cuminsa cu e proyecto na luna di april aña pasa cu e motivacion pa laga e comunidad plata nan mesun mata, y cosecha nan mesun produccion di fruta y berdura fresco y organico.

“Asina nan tin mata saludabel den nan cas. Esey ta e meta!” el a bisa.

A pesar cu e presencia di Covid-19 na Aruba tabatin su impacto riba nan proyectonan, nan a percura di sigui cu nan, entre otro Hofi Bario, Mercado di Rancho, Rancho Walking Tour, etc… E aña aki e fundacion Rancho ta sigui cu nan pa medio di e sosten cu nan tin. Pero semper nan mester sosten di boluntarionan. Ta nan esunnan cu principalmente por siña algo for di e proyectonan aki. Esaki ta e fruta principal cu nan ta bin hayando for di nan propio cosecha.

“Ta sumamente importante pa nos sigui enfoca riba busca boluntarionan sea di bario of di comunidad di Aruba,” el a declara na Bon Dia Aruba.

 

Pero tambe tin ciudadanonan den e bario di Rancho comprometi cu e proyecto aki. Den e asina yama Hanch’i Awa tin un meneer cu a cuminsa cu su mesun hofi cu ta un ehempel tangibel di e proyecto bunita aki.

Recuperacion di cunucunan

Ginelly a yega di start su mesun proyecto hunto cu Centro di Actividad Rancho, unda el a haya un fondo di Jamaica. E fondo aki ta yuda artistanan regional pa crea contenido online.

Ta trata di cualkier contenido cu por yuda desaroyo di cultura y otro temanan manera agricultura urbano. Den cuadro di esaki e ta bezig cu un proyecto cu tin di haber cu plantacion di mata. Ginelly su vision cu e proyecto aki ta pa haci limpi cunucunan na Aruba pa promove e sector primario di agricultura.

Un cunucu cu aworaki e ta dunando atencion ta situa na San Fuego, unda e ta uza material recicla pa plantacion. Nan a wordo colecta y recicla for di e cunucu mes. Tur sosten cu e ta hayando pa medio di benta di mata ta wordo canalisa pa percura e mantencion limpi di e cunucu.

Ginelly lo mustra esaki virtualmente pa siña un poco di e naturalesa di Aruba. Pero tambe con pa hacie limpi y yuda sostene e parti di flora tipico na Aruba.