Den e prome conferencia di prensa di Gobierno di Aruba pa aña 2021, prome minister Evelyn Wever-Croes a trece dilanti cu nan a decreta e aña aki como e aña di recuperacion economico, pa asina crea mas oportunidad nobo pa tur hende.

El a comenta cu esaki ta conta pa turismo y agricultura, pa locual nan ta bay concentra riba dje y e recuperacion financiero cu esaki ta trece cune. Pero tambe recuperacion den enseñansa cu no por cay atras door di e pandemia; recuperacion social pa mas atencion pa e famianan pa asina no haya mas problemanan social; recuperacion di salud cu e vacuna cu ta caminda y lo trece un luz na final di e tunnel; y pa finalisa, recuperacion laboral pa crea mas cupo di empleo.

Pa loke ta trata desaroyo economico nobo, prome minister a señala cu manera ya nan a anuncia caba, nan como gobierno ta purbando diferente tereno pa crea desaroyo economico. Durante e pandemia nan a institui un comision cu ta consisti di 250 persona cu a traha como boluntario pa crea un master plan ‘Reposicionando e Rumbo di nos Pais’.

Aparte di esey, el a menciona cu nan a institui un comision mas chikito pa asina nan presenta ideanan nobo y diferente pa por contribui na base di innovacion cu economia di Aruba.

Un di ideanan cu a wordo presenta y a wordo aproba ta loke nan ta yama Aruba’s Outdoor Amenity Economy, na unda lo crea un pilar economico di e patrimonionan cu Aruba tin como natural, cultural, y monumental por ehemplo. Di cada un di nan lo crea un desaroyo rond di dje di e mesun hendenan pa e hendenan.

El a splica cu durante e pandemia mundo henter y Aruba tambe a realisa cu actividadnan cu hende ta haci pafo ta mas sigur y hopi mas placentero, compara cu esun cu ta haci paden den un edificio y Aruba tin hopi potencial den area aki cu ainda esey no a wordo probecha y cu awor nan ta inventarisando den un programa di maneho strategico e balor economico di cada un di e patrimonionan aki.

E programa aki, segun prome minister tin tres ministerio cu ta envolvi cu ta ministerio di Asuntonan Economico, Ministerio di Turismo y Ministerio di Infrastructura, di e patrimonionan prome minister a sigura cu nan ta bay upgrade nan den e prome fase pa asina despues traha riba un plan con pa mehora e experiencia di e bishitantenan na cada un di e patrimonionan aki.

El a duna como por ehemplo, Ayo Rock Formation cu ta un patrimonio natural cu tin un balor historico enorme cu cellonan di indjan aden cu nan ta bay renoba cu un bon luga di parkeer, un entrada atractivo, borchinan di informacion y un luga pa bende souvenir di e patrimonio ey exclusivamente.

“Asina bo ta crea un experiencia pa e bishitante por bishita mas luganan di Aruba”, prome minister a sigura.

Eagle Beach ta un otro luga cu ta forma parti di esaki, pa motibo cu ta un playa cu a haya varios reconocemento internacional na unda nan lo upgrade y haci’e atractivo pa asina cada turista cu ta bin Aruba lo kier bay Eagle Beach pa saca un potret eynan y comparti’e. El a sigura cu e trabounan a wordo planifica y lo cuminsa pronto.

“Esaki ta bay crea oportunidadnan unico pa nos propio artesanonan, pasobra nos no ta bay ofrece souvenir cu ta traha di otro pais sino esunnan cu ta traha na Aruba”, prome minister a comenta.

Di esaki, el a manifesta cu lo crea un desaroyo economico pa cada un di e luganan aki y ta bay pa e hendenan, asina tambe ta duna mas realce y contenido na e turismo cu ta wordo ofreci pa e bishitantenan.

Pronto e comision cu a wordo institui lo informa con pa participa den e procedura y participa den e diferente tayernan creativo cu lo wordo organisa pa asina industria creativo y artesanal por prepara pa e desaroyo aki.

Tambe, el a trece dilanti cu historia indigena cu a tuma luga na Aruba y di loke ta trata oro, aloe, industria di fosfaat y segunda guera mundial nan lo bay bira parti integral di e producto “Aruba” pa e bishitantenan y tambe pa e mesun ciudadanonan, como muchanan di scol pa asina tur hende por cera conoci cu e fundeshi historico y cultural.

Otro cu lo a mester cuminsa na december pero a wordo posponi pa via di Covid-19, ta un mercado popular na Playa y na San Nicolas, prome minister a informa cu nan ta trahando riba e protocolnan cu mester pone in place pa nan ehecuta e proyecto aki, “mercado popular memey di e ciudadnan di Playa y San Nicolas”, cu por ta dirigi pa esunnan cu ta planta y nan kier bende esey na e luga aki, asina como tambe matanan, flornan of cuminda tipico cu ta wordo traha cu den mercadonan rond di mundo cu semper ta algo popular.

Di e mercadonan aki, prome minister a declara cu nan ta bay promove esaki pa nos bishitantenan cu e ta bay yuda pa atrae directamente mas hende pa e centronan di e ciudad, el a ripiti cu nan mester traha riba e protocolnan di prevencion pa asina evita aglomeracion di hende.

Pa e motibo ey, nan mester percura pa cu e cifranan di Covid-19 lo baha pa asina nan por haci di e proyectonan aki bira un realidad, di e comision cu ta encarga pa cu esaki, prome minister a enfatisa cu lo cuminsa cu preparacion y proceduranan pa e mercado cu “ta di nos pa nos mes”, el a finalisa.