Siman a habri cu e tristo noticia di fayecimento di Sra. Greta Posner, director di Giselle Department Store y miembro di Quota Aruba. Awe, su sernan keri ta duna un ultimo despedida cu acto di entiero.
Sra. Greta ta conoci na Aruba como e director visionario di e exitoso tienda Giselle Department Store na Noord, un di e prome tiendanan di su categoria den e districto aki na Aruba. E aña aki, Giselle Department Store ta celebrando 43 aña di existencia, sigur un muestra di e tremendo maneho y direccion di Sra. Greta.
Su sernan keri a describi Sra. Greta como un persona hopi stima, amoroso, cariñoso y fiel, kende tabata un ehempel den bida ya cu el a dedica su mes na su famia, amigo y empleadonan sin spera di ricibi nada back.
E tabata un persona semper dispuesto pa yuda y scucha y duna consuelo, y e tabata practica caridad cu actonan grandi di amor y detayenan chikito dia pa dia.
E ta recorda como un pilar di comunidad y un fuente di sabiduria, fortalesa y speransa.
Sra. Greta tambe tabata un miembro di Quota Aruba International pa 25 aña. E organisacion a describi Sra. Greta como un persona cu un gran sentido di servicio, kende semper tabata dispuesto pa yuda specialmente cu proyectonan pa mucha den necesidad, muhenan menos privilegia, y proyectonan pa adultonan mayor. Quota ta recorda Sra. Greta como un miembro dedica cu a traha duro cu un gran curason pa servicio, representando e principionan di compasion y comparti.
Sra. Greta su legado na Aruba sigur lo perdura durante tempo.
Bon Dia Aruba ta manda palabra di condolencia pa famia y sernan keri di Sra. Greta Posner, y cu Sra. Greta sosega na paz.
