Fundacion SIKI ta cordialmente invita pueblo di Aruba pa bin forma parti di e prome seminario y debate riba tema di seguridad y derecho di pashent cual lo tuma luga riba 17 di September 2022, for di 3or di atardi te cu 6or di atardi na Cas Di Cultura. Entrada ta completamente gratis.
Fundacion SIKI ta un organisacion cu ta specialisa den yuda ciudadanonan yega na un miho calidad di bida y provee conocemento y recursonan necesario pa logra esaki debidamente. SIKI ta sostene e temanan di derecho di pashent y calidad di cuido.
E organisacion mundial di Salud [World Health Organisation] a convoca un yamada na tur pais rond mundo pa conmemora 17 di September pa papia y traha riba seguridad di pashent. E yamado ta pa tur aña conscientisa y traha riba e area aki pa cuminsa enfoca riba derecho y cuido debido di pashent.
Esaki ta algo cu mester confronta hunto pa por sigui desaroya segun Mr. Dr. Jayburtt Dijkhoff.
E tema e aña aki ta seguridad di medicamento pa motibo cu aunke hopi esfuerso ta wordo haci, ainda segun fundacion SIKI, nos por haci mas pa mehora e seguridad y calidad di e cuido brinda na pashent.
Lo tin diferente profesional cu lo bin papia na e seminario aki y ta hopi importante pa pueblo bin scucha kico tur lo wordo papia pa instancianan di cuido y profesionalnan medico riba kico nan ta haci den cuadro cu seguridad di pashent y na unda mester sigui inverti. Mr. DR. Jayburtt Dijkhoff lo duna un charla riba seguridad y derecho di pashent, Boticario Dasha Dubero lo elabora riba seguridad di medicamento, Maureen Kelly tambe lo ta presente pa papia tocante e bos di un hunta di pashent, y despues lo finalisa cu un debate riba e tema di seguridad di medicamento y derecho di pashent.
“Cuido ta draai rond e pashent, pa e motibo aki nos kier enfoca mas riba esaki pa asina tambe pashent tambe por tin un bos,” segun sr. Jayburtt Dijkhoff. Lo tin varios otro organisacion cu tambe lo participa durante e charla aki entre otro Inspectie Volksgezondheid, HOH, HAVA, ImSan, Clientenraad Respaldo y AZV. Pa participa, mester registra riba www.sikiaruba.org of na Club Kibrahacha 60+. Por acudi pagina di Facebook di SIKI Aruba pa mas informacion.
