Wit Gele Kruis: ‘Mas hende jong sufriendo di malesa cronico pa motibo di mal estilo di bida’

Director di Wit Gele Kruis, Gino Goeloe ta remarca cu edad di hobennan cu ta sufriendo awendia di malesanan cronico ta birando cada bes mas y mas jong. Esaki ta pa motibo segun Sr. Goeloe, e estilo di bida di e hobennan, enfatisando cu a yega ora pa Aruba bin cu un plan di prevencion.

E situacion ta asina alarmante cu bo ta haya por ehempel hobennan adulto di 20 aña cu ya caba ta sufri di presion halto of sucu halto. “Esaki ta bay cu bo estilo di bida,” segun Sr. Goeloe. Ora cu mester analisa e estilo di bida di hopi di e hobennan aki, bo ta mira cu hopi ta come demasiado ‘fast food’ y no ta cushina na cas. Nan ta consumi hopi cuminda di caya cu ta consisti di hopi vet y sucu, hopi salo tambe, y tur esaki ta e combinacion di mas malo cu tin. “Nos pueblo ta sobrepeso, obeso, den e caso aki mester bay baha peso pasobra si nos sigui subi peso bo lo mira mas chens di bira diabetico. Hopi hende no ta pensa cu peso ta bay cu sucu,” segun Sr. Goeloe.

Ora bo bira diabetico bo adernan ta cera, bo ta haya bo mes confronta cu tur sorto di malesa, bo wowo ta bay atras, bo nier ta bay atras, anto esey ta e consecuencia di sobrepeso y obesidad.

‘Prevencion ta solucion’
Mester bay enfoca mas den prevencion segun Wit Gele Kruis, pa cuminsa conscientisa pa come mas saludabel y pone mas berdura den bo cuminda por ehempel, come mas fruta, bebe 7 glas di awa pa dia y cosnan asina.

“Tambe mester zorg pa tin cuminda mas balansa, si por mas cuminda manera carni blanco, galiña cu pisca, tambe ehercicio y movecion ta importante. E parti di drumimento ta esencial, 7 pa 8 ora pa dia ta loke ta suficiente pasobra bo curpa mester su sosiego. Drumi 4 of 5 ora no ta suficiente,” Sr. Goeloe ta comenta.

Awor cu tin temporada di calor, ta esencial pa bebe hopi awa y no bay hopi den solo, haci bo movecion parti mainta of atardi ora solo ta menos. “Bo curpa ta traha pa move, mey ora of 45 minuut pa dia, nos tin cu move.”

Wit Gele Kruis ta bati alarma cu si sigui e manera cu nos ta bay, AZV lo bira impagabel, nos ta riba 500 miyon pa aña uzando di e placa di belasting, esey ta algo cu prevencion so por soluciona pa baha e peso di AZV.