(ElNuevoDia) – Un estudio, den desaroyo ainda, di Recinto de Ciencias Medicas (RCM) di Universidad di Puerto Rico (UPR) a revela cu persona cu ingreso di mas di $60.000 pa aña y cu mas nivel di educacion formal tin mas probabilidad di haya vacuna contra Covid-19.

E resultadonan preliminar di e estudio poblacional “Puerto Rico: Evaluacion epidemiologica y prevencion para COVID-19 e influenza” (Prepcovi) a duna cu di 2.884 encuestado cu a proporciona informacion tocante e proceso di vacunacion, 46% di esnan vacuna tin ingreso di mas di $60.000, loke ta representa mas di doble e 19% di persona vacuna cu ingreso menos di $20.000.

“E vacunanan ta gratis, y e mensahe a circula, pero no ta parce di yega. Por ta cu e no ta yega o e acceso den sentido cu e personanan no tin auto pa bay na e centronan o nan no tin e equipo electronico pa registra. Nos no sa e causanan exacto, pero por ta un combinacion di ambos,” doctora Kaumudi Joshipura a bisa, ken ta investigador principal y profesor di Escuela de Medicina Dental di RCM.

Vacunacion ta na un punto importante pa e pais. Departamento di Salud a reporta ayera cu tabatin 847 caso nobo di Covid-19 y ocho morto. Cu e resultadonan nobo aki, e total di caso confirma ta subi te 11.348, mientras cu e total di caso probable ta na 15.036 y caso sospechoso na 111.347.

E dia cu e cantidad mas grandi di fayecido registra ta dia 22 di april (8). Awor e total di fayecimento a subi te 2.246 cu ta dividi entre 1.915 caso confirma y 331 probable.

 

LEAVE A REPLY

Please enter your comment!
Please enter your name here