Presidente di Rusia Vladimir Putin a adverti cu e crisis escalando na Noord Korea por causa un catastrofe planetario cu un cantidad hopi halto di morto. El a bisa cu e sancionnan cu Merca kier sigui introduci pa Pyongyang ta inutil. “Mas histeria militar den condicionnan manera esey ta inutil, e ta bira un ‘dead end’, el a bisa reporteronan na China. “Esaki por bira un castastrofe global unda cu hopi hende lo perde nan bida. Unico manera pa resolve problema cu Noord Korea ta cu dialogo.”
Diadomingo, Noord Korea a lansa nan di seis test nuclear cual te ainda ta esun di mas fuerte tambe. E impacto a causa un temblor di magnitud 6.3 y tabata mas poderoso cu e explosivonan cu Merca a tira riba Hiroshima y Nagasaki durante segundo guera mundial.
Putin tabata atendiendo e Brics Summit, unda tur lider di Brazil, Rusia, India, China y Sur Africa a bini hunto. Diamars riba e ultimo dia di e conferencia aki na Xiamen, China, el a bisa cu Rusia ta condena provocacionnan di Noord Korea pero tambe cu mas sancion no ta bay ta efectivo y no lo produci nada cu djis hopi mas problema.
Fuente: The Guardian
