Qredits ta sigui expande su servicionan na Aruba

Richard Arends (AVP)

Acceso na capital ta un di e retonan mas grandi pa empresanan chikito y mediano. “Varios aña despues di e prome asercamento entre Aruba y Qredits – un fundacion non profit cu ta facilita micro financiamento na entrepreneurs y start ups pa cuminsa nan propio negoshi – nos a cera un aliansa strategico pa asina facilita acceso na financiamento pa empresanan chikito,” asina ex-minister di Asuntonan Economico y actual miembro di Parlamento di Aruba pa fraccion di AVP, sr. Richard Arends, a splica. “Awe cu orguyo nos ta wak cu Qredits a muda pa un localidad mas grandi y ta sigui expande su servicionan na Aruba awor ofreciendo creditonan te cu Afl 100,000.”

Den cuadro di Dialogo Social, gobierno e tempo ey, a cera un MOU cu e sector financiero pa pone capital disponibel pa entrepreneurnan di negoshinan chikito. For di eynan a start cu e mision pa logra esaki. “Hunto cu Prome Minister Mike Eman, mi tabata envolvi den realisacion di e iniciativa aki cu miras pa diversifica nos economia. Esaki a bira un mision cu a wordo cumpli aña pasa, na momento cu a firma e acuerdo cu Qredits cu a establece su prome oficina den MFA Noord na april di a aña aki,” sr. Arends a conta.

A identifica cuatro pilar nobo pa actividadnan economico: logistica, tecnologianan limpi, exportacion di conocemento y industrianan creativo. “Empresanan chikito y mediano ta e motornan tras cada un di e sectornan nobo aki y facilitando acceso na conocemento, expertisio y capital, nos ta fortifica nan posicion y alaves contribui na e diversificacion genuino di nos economia.” Pa haci esaki posibel, no solamente a facilita acceso na capital, pero tambe na conocimento. Departamento di Asuntonan Economico a establece un seccion specialmente dirigi pa logra esaki, esta IDEA y Exprodesk.

Aruba tin un sector financiero stabil y solido. Expansion di actividadnan di Qredits ta nifica tambe un diversificacion e sector aki. Loke ta diferencia Qredits di e demas institucionan financiero ta cu e instancia aki no ta pidi colateral pa e fianza. Aprobacion di e fianza ta basa primordialmente riba e plan di negoshi cu ta wordo presenta, como tambe e habitonan y motivacion di e empresario.

“Mi kier a felicita Qredits cu inauguracion di su localidad nobo y expansion di su servicionan.  E hecho aki ta confirma confianza di Qredits den economia di Aruba,” sr Arends a bisa. “Negoshinan chikito ta e wes’i lomba di nos economia, pero cu of sin capital un idea, soño of vision di un empresario sea ta haya bida of ta muri. P’esey presencia di un instituto manera Qredits  na Aruba ta algo asina necesario”.

 

You May Also Like

Parlamentario Mervin Wyatt-Ras (AVP): ‘Sosten unanime pa aproba ley di enfermedadnan di infeccion’

ORANJESTAD – Parlamento a trata cambio den ley di enfermedadnan di infeccion manera dengue, ...

Partido MEP na Mike Eman: ‘Cannabis recreacional no ta punto di agenda’

Tratamento den parlamento di presupuesto di pais Aruba ta algo serio. Pero un biaha ...

E realidad di e maneho “green” of “greenwashed”(?) di gobierno actual

  Durante decenas di aña e refineria a causa cancer y otro malesa. Y ...

Legalisacion di droga recreacional na Aruba lo ta desastroso pa nos comunidad.

Tanten cu lider di partido RED ta para firme pa legalisacion di droga recreacional ...

‘Ban celebra Dia di Betico na grandi’

Dia 25 di januari ta un fecha special pa Aruba. Un dia nacional na ...