Quota Internacional of Aruba lo tene nan evento anual pa recauda fondo, dia 3 di november na Renaissance Convention Center.
Ivy Simon, presidente di Quota Internacional, a splica cu normalmente tabatin evento e siman prome cu dia di tata, pero e cambio a bin pa un conferencia di region na Aruba cu 75 miembro di Quota. Den e conferencia a atende persona di Hulanda, Corsou, Sint Eustatius, Surinam y Trinidad & Tobago. Nan ta cumpli 100 aña di celebrando Quota Internacional, y na Aruba 32 aña.
Quota Internacional ta un organisacion cu ta duna servicio dedica na mehora calidad di bida di esunnan menos afortuna, y principalmente esunnan cu tin problema di oido y habla. Tambe na muhe y mucha den dificultad.
“Nos ta dedica nos mes na diferente area di servicio. Esaki nos ta hacie na diferente manera. Tur aña nos ta traha un programa di servicio pa asina duna man mas tanto na proyecto di caridad”, Simon a expresa.
Nan ta comparti tambe cu muchanan di Centro Ortopedagogico di Aruba. Cu evento aki nan ta distribui e fondo cu nan ta acumula durante an1a y nan ta haci donacion na instancia social y caritativo ‘pa yuda cu e bon trabou cu nan ta haciendo’. Pa por continua cu esaki nan ta haci nan recaudacion di fondo anual, caminda tur loke nan recauda ta bay bek pa comunidad. “Quota no por cumpli sin ayudo di henter pueblo di Aruba.”
Vicky Booi, miembro di Quota pa 15 aña, a splica cu estilo di evento lo ta Bohemio. Un estilo di hippie cu tabata na moda den añanan 60-70, y henter e evento lo ta den estilo ey. “Nos ta spera comunidad contribui y gosa.”
Kristel Van Nes, kende ta service director di Quota, a duna splicacion di e evento cu ta 12or di merdia te cu 5or di atardi. Un costo di 185 florin pa persona. Esaki ta inclui e buffet. Tambe lo tin musica di Robert y su Solo Banda Show hunto cu Tsunami, y tambe premio sorpresa.
“Tur fondo cu recauda ta bay bek den comunidad pa esunnan mas vulnerabel y cu por probecha di e fondo aki. Bin pasa dia ameno cu estilo Bohemio. Carchi ta obtenibel cerca tur miembro di Quota, Aruba Vision Center, y durante luna lo sigui informa unda mas tin ticket”, Van Nes a finalisa.
