Diahuebs atardi Quota International of Aruba a yama un conferencia di prensa pa anuncia cu nan campaña di bende earplugs den temporada di carnaval a cuminsa. 

E presidente actual di Quota, Luzina de Greef a trece dilanti informacion di nan proyecto di tur aña pa ‘cuida bo oido’ specialmente den tempo di carnaval. Asina mes, director di Servicio Gladys Kock a splica cu un di e metanan di Quota ta e cuido di bo oido caminda por ehempel den luna di september nan ta presenta e “Siman di Kibra Silencio” caminda e comunidad por haci un cita na Fepoh y na The Specialist pa un chekeo gratis di nan oido.

Despues di dos aña cu a pasa den pandemia y cu no tabatin carnaval, Quota ta back pa corda y conscientisa comunidad cu carnaval ta hopi dushi pero mester cuida oido y proteha esaki contra e zonido duro y specialmente cuida e oido di nos muchanan.

Tur aña e miembronan di Quota Club ta bende earplugs durante e paradanan di Carnaval y nan ta wordo reconoci pa nan T-shirtnan di Quota blauw, unda cu e aña aki tambe ta bay tin di color blanco cu e logo riba dje. E prijs pa e earplugnan a keda mescos, cual ta Afl. 1 pa esun di mucha y Afl. 2 pa esun di adulto.

Quota no por haci esaki sin ayudo di nan sponsornan unda nan duna un danki grandi na WEB nan sponsor principal, cu pa 12 aña caba ta sponsor tur e earplugnan di mucha. Tambe danki na WEB cu nan por a bishita e scolnan basico caminda conhuntamente cu Glen Rock di WEB nan por duna charlanan na e muchanan di 6de klas, pa asina nan por haya splicacion cu zonido duro ta dañino pa oido y si ta perde esaki e no ta bin bek.

“Nos a ripara cu den e tempo moderno di awe, e muchanan ta exposed na zonido duro, manera musica di banda duro of ora di usa headphones, airpods etc”. Kock a bisa.

E biaha aki e enfasis ta pa nan bishita e scolnan basico di pariba di brug.

Tambe Quota kier anuncia cu e aña aki tambe nan tin un joint venture cu “The Specialist” cu hunto cu nan miembronan di Quota lo subi caya y bende earplugs, di cual tur fondo recauda ta wordo duna na Quota Club, “tur fondo recauda cu e benta di earplugs, den temporada di carnaval, ta bay bek den nos comunidad”.

Tambe nan a gradici “All Safety” cu tambe a yuda nos cu un parti di donacion di earplugs. Cu tur e donacionnan aki menciona Quota por subi caya un biaha mas bendiendo earplugs y conscientisa e comunidad, pa cuida oido y pa asina pa tur hende por disfruta di un dushi carnaval.

Manera ta custumber, nan earplugs tambe ta na benta via diferente localidadnan rond di Aruba,como por ehemplo na Mrs. Minute, Giselle Department Store, FEPOH, The Specialist, K&G Piedra Plat y San Nicolas.

Si tin organisacion, scolnan of gruponan cu tin actividad carnavalesco cu ta desea di cumpra earplugs, pa nan usa durante e actividad aki, por tuma contacto cu e miembronan di Quota of por contact nan via e Facebook page, Quota International of Aruba, of por manda un e-mail na secretaria, qia.secretary@gmail.com pa haci pedido pa e earplugnan.