Raad van State ta urgi Gobierno di Reini Hulandes pa tene cuenta cu paisnan den Caribe na momento di cera tratado internacional. Raad van State ta e instancia di conseho mas halto di Reino y por duna conseho pidi of no pidi.
Den e caso aki Raad van State a dicidi pa conseha Conseho di Minister di Reino pa ora cu negocia un tratado, tene cuenta kico ta necesario pa ora cu mester ehecuta/implementa e ley aki den e paisnan Caribense di Reino Hulandes. “Para keto, mas amplio cu awor ta e caso, riba efectonan cu un tratado asina lo por tin riba e paisnan y e ciudadanonan Hulandes cu ta biba eynan,” ta locual Raad van State a manda bisa Gobierno Hulandes.
Raad van State, particularmente su seccion di conseho, a analisa con ta cera tratado den Reino, con ta involucra tur pais di Reino den e proceso, y cu ta aplica e cuadronan huridico na momento di cera un tratado. Mas ainda, ta busca unda por trece mehoracion.
E departamento di conseho di Raad van State a bisa cu regularmente mester determina cu na momento cu ta cera, ratifica y implementa tratadonan no ta bay facil den e structura di Reino Hulandes. Reino ta internacionalmente un entidad, pero ta existi di cuater pais diferente. Cada pais ta dicidi riba su asuntonan interno, pero ta Reino Hulandes ta cera tratado cu otro pais. E punto di salida ta cu e tratadonan cu Reino ta cera ta conta pa tur e cuater paisnan.
Como tal, e seccion di Conseho di Raad van State ta opina cu mester wak con un tratado ta mishi cu tur pais, incluso esnan den Caribe. Y a constata cu no tur ora ta tene cuenta cu e realidad aki. “Den hopi caso, pa motibo di aparato publico limita riba e tereno aki den e paisnan den Caribe, pero tambe di banda di Hulanda mester tin mas atencion pa e participacion y compromiso di e paisnan den Caribe.”
E pregunta si un tratado lo mester conta pa un of mas di e paisnan den Caribe lo mester haya un contesta mas cauteloso, segun Raad van State. E Ministerionan envolvi mester tene cuenta cu e concepto di derecho humano y nacionalidad comparti denter di Reino. Si tratadonan ta bay riba e temanan aki, anto e proceso pa cera un acuerdo na nivel halto asina y su ehecucion merece mas atencion. “Aunke cu derecho Europeo no ta conta completamente pa paisnan den Caribe, su aplicacion ta birando mas y mas grandi. Ta asina cu ciudadanonan Hulandes den Caribe por apela riba derechonan cu ciudadanonan Europeo tin. Esaki, segun e seccion di Conseho di Raad van State, ta nifica cu mester involucra e paisnan Hulandes den Caribe den e tratadonan cu Union Europeo ta cera cu paisnan miembro.
Recomendacion
E seccion di Conseho di Raad van State a presenta un serie di recomendacion riba e tereno aki. Pa cuminsa, Conseho di Minister di Reino mester pone mas atencion na e pregunta kico ta necesario pa por ehecuta un tratado den e paisnan Caribense di Reino.
Tambe mester organisa e proceduranan di tal forma cu ta tene cuenta cu e procesonan interno den e paisnan y nan capacidad publico limita.
Mester clarifica suficientemente, con e Ministerionan di Hulanda ta determina si un tratado lo por tin efecto pa paisnan den Caribe y den un caso asina cu e paisnan mester ta envolvi den creacion di e tratado en cuestion.
Mester contesta hopi mas preciso si un tratado ta conta pa e paisnan Hulandes den Reino. Pasobra esaki ta nifica cu e paisnan mester asumi un rol mas activo y indica na tempo cu nan mester di ayudo. Hulanda lo por ofrece e ayudo aki.
Mester pone mas atencion na e pregunta si e balornan di Reino, manera derecho humano, bon gobernacion, y seguridad legal ta hunga un papel den e tratado. Y si esey ta e caso, Raad van State ta haya cu mester percura cu ehecucion di un tratado asina haya mas atencion tambe.
Hulanda mester ta habri pa wak kico ta e efectonan di un tratado asina pa e paisnan den Caribe y e ciudadanonan Hulandes, y mester clarifica e proceduranan.
Si Union Europeo ta cera un tratado cu otro pais miembro, mester analisa si esaki tin efecto pa e paisnan den Caribe.
E relacion entre e organonan publico di Boneiro, St. Eustatius y Saba y Union Europeo di otro banda mester keda evalua ainda. Raad van State ta urgi Hulanda pa pone atencion na e evaluacion aki, particularmente na e nificacion di tratadonan tur mescla pa e islanan aki cu ta forma parti di Hulanda.
Raad van State a publica e conseho aki na principio di Juli, 2021.
