E inventario hotelero di Aruba ta expande oficialmente fin di maart 2021 cu apertura di Radisson Blu. E hotel ta di 133 camber y ta uno di luho. E noticia aki a reparti cu tur mercado internacional cu ta bisa cu ta trata aki di un hotel di clase halto, cu ta cla pa duna servicio positivo y personalisa.

Radisson Blu ta situa na Palm Beach, pero no directamente riba beach. Pesey mes, den su relato, ta describi cu e hotel ta algun paso di ‘beachfront’. Despues cu Radisson a bende su propiedad na Aruba cu awor ta Hilton, pero awor ta bolbe Aruba cu e hotel nobo aki. Segun e relato, Radisson Blu ta e ultimo den un periodo di crecemento notabel pa Raddison den e continente. Asina a yama hotelnan nobo na Toronto, Canada; Anaheim, California; Punta Cana, Republica Dominicana; y Fargo, North Dakota.

Raddison Blu tin suitenan di dos y tres camber cu areanan di biba y drumi separa, y cushinanan completo. Ademas di diferente facilidad pa entretenimento, Aruba lo bolbe tin e Radisson Sunset Bistro.

Aunke cu e ta situa na distancia cu por cana bay beach, e hotel nobo lo percura pa servicio di shuttle pa su huespednan bay beach. Nan lo tin acceso na un area designa pa drumi riba beach, unda nan lo por haci uzo di locual Palm Beach ta ofrece. Banda di esey, e hotel cu ta e otro banda di caminda di Palm Beach Plaza, ta ofrece su huespednan e oportunidad pa participa den tur e actividadnan cu e restaurantnan, clubnan y otro entretenimento den area, incluso na Paseo Herencia.

Radisson Blu Aruba ta bisa di ta bay implementa e Radisson Hotels Safety Protocol program, unda ta enfoca riba limpiesa y protocol di disinfeccion, cu a keda desaroya cu SGS, cu ta e compania internacionalmente renombra pa inspeccion, test, y certificacion.

Aki ta trata di un hotel nobo cu a bin na luga di un proyecto di condominio cu no a logra y despues a bende na otro desaroyador. Mester bisa cu no a ilustra con e mercadeo lo ta den e periodo di pandemia, pero di otro banda, e relato tabata un introduccion di e hotel na e mercado internacional.

Pa mas informacion check nan website: https://www.radissonhotelsamericas.com/en-us/hotels/radisson-blu-aruba