Nos campaña anual introduci na 2022, yama “Eight to Eight, Because Our Planet Can’t

Wait” a ser cambia pa “Building Up STEAM for Sustainable Development” (Creando e Forza mediante STEAM pa Desaroyo Sostenibel), den cual STEAM ta para pa Ciencia, Tecnologia, Ingenieria, Inteligencia Artificial y Matematica (Science, Technology, Engineering, Artificial Intelligence, Mathematics). E campaña aki ta corre annualmente di April 12, te cu Juni 20.

Dia di Propiedad Intelectual – 26 di april

Dia 26 april 1970 e Tratado Mundial di Propiedad Intelectual a drenta na vigor y na 2000 e paisnan miembro di e Tratado a dicidi pa 26 April keda designa como Dia Mundial di Propiedad Intelectual.

Dia Mundial di Propiedad Intelectual ta ofrece un oportunidad unico pa uni mundialmente pa reflexiona riba con un sistema ekilibra di propiedad intelectual por haci florece e panorama artistico mundial y facilita e innovacion tecnologico pa duna impulso na progreso humano.

E campaña anual riba e dia aki ta pone enfoke riba e papel cu derechonan di propiedad intelectual manera patent, marca, diseño industrial y derecho di autor ta hunga pa fomenta y recompensa innovacion y creatividad, na e mes momento garantisando cu investigador, diseñador, artista y sociedad beneficia di esakinan.

Deporte y Propiedad Intelectual: prepara, cla y innova

Cada 26 April nos ta uni pa celebra Dia Mundial di Propiedad Intelectual.

Na 2026 nos ta pone e enfoke riba deporte y propiedad intelectual, destacando con propiedad intelectual ta impulsa creatividad y innovacion den mundo di deporte.

E tema pa 2026 ta “Intellectual Property and Sports: Ready, Set and Innovate!”, esta Deporte y Propiedad Intelectual, Prepara, Cla y Innova!

Derechonan di propiedad intelectual ta ser aplica den equipo vanguardista y tecnologia cu ta cambia e reglanan di wega y marca y diseño inspirador ta genera un cultura dinamico cu ta inspira y conecta hende den henter mundo.

Riba e Dia Mundial di Propiedad Intelectual 2026 nos ta celebra creador, inventor y empresario di cual nan pasion y idea ta impulsa e futuro di deporte.

Mensahe di Director General di Organisacion Mundial di Propiedad Intelectual

Nos tur ta gusta deporte. Velocidad, e potencia, drama y e momentonan extraordinario. Pero tras di tur record cu ta ser bati y cada wega impactante tin algo cu mayoria di e fanaticada di deporte no ta realisa. Innovacion. Creatividad. Propiedad intellectual. Di zapato di peso mas lihe, racket mas solido, helm (casco pa cabes) mas sigur. Ta patente ta proteha e innovacion den tur esaki y na mes momento ta encurasha investigacion y inversion den tecnologia pa deporte.

Y alabes tin e identidad y branding di deporte mediante logo di ekipo, nomber di atleta y imagen identificador. Marca registra ta yuda crece y establece marcanan cu ta promove mercadeo global di deporte y cu cual fanatico ta identifica nan mes.

Derecho di diseño ta proteha e estilo di deporte. Di trahe di natacion y sapato atletico te cu equipo di tennis.

Y ora e accion ta aparece riba nos pantaya di television, telefon mobil of computer mediante transmision en vivo of medionan social, ta derecho di autor ta proteha e contenido cu ta conecta biyones di fanatico rond mundo.

Y tur esaki ta aplica tambe na e-sports, un segmento grandi y creciente di e industria di deporte mundial.

P’esey e aña aki Dia Mundial di Propiedad Intelectual ta celebra propiedad intelectual y deporte. Pasobra deporte ta mas cu simplemente competencia. E ta un industria multi-triyonario generando empleo y oportunidad pa hopi hende. Pero esaki ta nifica cu mester sa con pa proteha, maneha y aumenta e propiedadnan intelectual cu awendia ta forma parti di deporte.

Propiedad intelectual ta yuda atleta mehora nan prestacion, ta sirbi pa conecta fanatico cu nan equipo faborito, y ta duna empresa di deporte e confianza necesario pa inverti den equipo, tecnologia, sistema y idea nobo.

Propiedad intelectual no ta solamente cambia e wega, e ta dun’e su forma.

Prepara, Cla y Innova!