(AP) – Ye, e rapper anteriormente conoci como Kanye West, a presenta brevemente na e huicio di trafico sexual na New York contra Sean ‘Diddy’ Combs riba diabierna pa sostene e magnate di hiphop, un amigo di hopi tempo. Sinembargo e no tabata permiti drenta sala di corte y a bay poco despues di mira e huicio riba monitor den otro camber.
Ye, bisti na blanco, a yega corte federal di Manhattan prome cu atardi mientras e huicio tabata riba break y a pasa cerca di 40 minuut den e edificio. Despues di a sali for di un screening similar na aeropueto, a puntra Ye si e ta na corte pa sostene Combs. “Si,” el a contesta pero no a responde ora a puntra si e lo testigua pa Combs ora cu defensa cuminsa su presentacion proximo siman.
Seguridad di corte no a hib’e e di 26 piso unda e huicio ta tuma luga, den un di e cas di corte su salanan mas grandi. Entrada na e sitio aki ta estrictamente controla, cu asientonan reserva pa Combs su famia y ekipo legal, media y espectadornan cu ta warda den rij pa oranan largo pa por haya un asiento.
E rapper a ser hiba na un sala di corte 3 piso bao di esun di e huicio. Aki, el a mira brevemente e testimonio riba e monitor. Esaki ta un di e salanan pa e personanan cu bay pa wak e huicio pero no ta logra haya asiento den e sala principal. Ye tabata den e di dos sala, pa motibo cu e prome tabata yen di representante di media y empleadonman di corte cu a tende eroneamente cu e lo ta den e sala.
Despues cu e informacion di su localisacion exacto a cuminsa plama y spectadornan a cuminsa drenta e sala unda Ye tabata, den prome fila cu yiu homber di Combs, Christian, un guardaespalda y otro di Combs su sostenedornan, Ye a wak rond di e sala prome cu el a lanta y bay, conhuntamente cu e otronan cu tabata cu su persona.
Ye no a contesta mas pregunta ora cu el a sali for di e sala di corte, pasando e reporteronan y camaranan di television.
Den corte unda e huicio a tuma luga, Combs di 55 aña, tabata contento y altanto cu su amigo a bishita mientras familiarnan incluyendo su mama tabata mira e proceso. El a declara su mes inocente na e cargo di trafico sexual y conspiracion di crimen organisa unda ta bisa cu el a usa su fama, fortuna y violencia pa comete crimennan durante un periodo di 20 aña.
Ye su presencia na corte a bini despues cu un muhe identifica solamente como “Jane” a caba 6 dia di testimonio.
