Ayera den reunion publico solicita pa fraccion di MEP, a trata un di e tres rapportnan produci pa Contraloria General (ARA). E tratamento den parlamento riba e rapport aki tin di haci cu e proyecto infrastructural cu gobierno anterior a bin cune, ‘Bo Aruba’, pa mehora e producto Aruba pa medio di dje.

Durante e reunion aki tabata presente Prome Minister, Evelyn Wever-Croes; Minister di Finansa y Economia, Xiomara Maduro y Minister di Infrastructura, Marisol Lopez-Tromp kende a bin entre otro cu e director di DOW, Marlon Croes.

Den e reunion aki tabata notabel e presencia di e miembronan parlamentario di e tres fraccionnan di coalicion di gobierno (MEP-POR-RED), pero di otro banda e presencia di e miembronan di e fraccion di oposicion di AVP tabata pober. Sala di parlamento a conta entre su publico cu presencia di un grupo di studiante di EPI sector Economia y tambe di representantenan di ARA.

Rapport.
Miembronan di e fraccionnan di coalicion a considera e rapport aki como uno serio y confiabel, sin niun influencia politico, y produci pa un instancia cu ta gosa di credibilidad manera ARA. Aunke algun parlamentario ta considera cu e rapport aki a drenta un ‘tiki laat’. Pero otronan a cualifica esaki como un rapport importante pa evita cu cosnan asina no bolbe sosode riba nos pais.

Un aspecto cu a resalta durante e reunion aki tabata cu a pesar di tur conseho duna riba e riesgo cu un proyecto di e embergadura di Bo Aruba tabatin pa nos pais, gobierno a dicidi di bin cune.

E riesgo mas tanto tin di haci cu nan tabata proyecto miyonario, unda e debido control no a wordo haci, caminda debe a wordo haci sin pensa riba entrada y con pagabel e proyectonan aki por ta. Parlamentario Setty Chistiaans-Yarzagaray a ilustra esaki cu un ehempel simpel.

E miembro di parlamento aki, experto den cifra y data, a referi cu ora bo ta bati porta di un banco pa un hipoteca, nan ta pidi bo un prueba di bo entrada y gastonan. Y ta depende di bo entradanan y bo gastonan, y tambe a base di e banco su reglanan, nan ta fia bo e placa pa realisa bo proyecto. El a bisa cu tambe e gastonan mester ta manehabel pa un pais su finanzas publico por keda den un forma sano. “Unda un pueblo no haya e efecto di esaki,” el a bisa.

 

LEAVE A REPLY

Please enter your comment!
Please enter your name here