Rapport di KNMI: Scenario mas severo ta proyecta te 51% menos yobida na Aruba pa 2100

Un rapport cientifico nobo cu ta presenta scenarionan climatico desaroya specificamente pa Aruba, Corsou y Sint Maarten ta proyecta un futuro considerablemente mas seco pa Aruba. Den e scenario mas severo analisa, cantidad anual di yobida na Aruba por reduci cu 51.3% pa 2100 compara cu 1991-2020. E estudio ta indica tambe cu temperatura lo sigui aumenta, calor extremo por bira mucho mas frecuente y nivel di lama lo sigui subi.

E informacion ta sali for di e rapport “Climate Scenarios for Aruba, Curaçao and Sint Maarten: Scientific basis, methodology and projected climate change for 2050 and 2100”, publica pa Koninklijk Nederlands Meteorologisch Instituut (KNMI). E estudio, fecha 23 di juli 2026, a ser prepara den colaboracion cu entre otro Departamento Meteorologico Aruba (DMA), Meteorological Department Curaçao, Meteorological Department Sint Maarten y International Panel on Deltas and Coastal Areas (IPDC). National Climate Resilience Council (NCRC) di Aruba tambe a participa den coordinacion di e proyecto.

Segun e investigadornan, esaki ta e prome biaha cu scenarionan climatico specifico a ser desaroya pa Aruba, Corsou y Sint Maarten. E trabao ta basa riba metodologia di scenarionan KNMI’23, pero adapta pa incorpora observacion meteorologico local, caracteristicanan climatico di cada isla y aporte di e servicionan meteorologico local.

Bon Dia Aruba anteriormente a publica varios articulo tocante cambio climatico, secura, aumento di temperatura y Climate Impact Atlas. E rapport nobo ta agrega un base cientifico mas detaya na e informacion cu ya ta conoci, cu scenarionan cuantifica specificamente pa Aruba.

Pa calcula cambio den futuro, investigadornan a usa e periodo 1991-2020 como referencia. Durante e 30 añanan ey, Aruba tabatin un temperatura anual promedio di 28,5 grado Celsius, un promedio di 498 millimeter di yobida pa aña y un velocidad promedio di biento di 7,6 meter pa seconde. Compara cu Corsou y Sint Maarten, Aruba tabata e isla mas cayente, cu mas biento y mas seco.

Yobida ta un di e aspectonan cu mas ta sobresali den e rapport. Mayoria di scenario ta apunta den direccion di condicionnan mas seco pa Aruba durante e resto di siglo. Sinembargo, investigadornan ta enfatisa cu incertidumbre rond di cambio den cantidad di yobida ta considerablemente mas grandi cu esun rond di temperatura.

Pa tene cuenta cu esaki, e estudio ta combina tres scenario di emision mundial; abao, modera y halto, cu dos posible reaccion regional den yobida. Uno ta representa un reduccion relativamente modera den yobida y e otro un futuro cu secura mucho mas fuerte. Asina, seis scenario climatico ta ser presenta pa cada isla.

E diferencia aki ta esencial pa interpreta e cifra di 51.3%. E rapport no ta predici cu Aruba definitivamente lo haya 51.3% menos yobida pa 2100. E cifra ta pertenece na e combinacion mas severo analisa: emision mundial halto hunto cu un scenario regional di secura fuerte.

Bao di e scenario ey, yobida anual na Aruba por reduci cu 51.3% pa 2100 compara cu 1991-2020. Durante temporada seco, reduccion por yega na 59.6%, durante temporada di transicion na 59.9% y durante temporada di yobida na 48.6%.

E cifranan ta mustra cu tin basta incertidumbre tocante cuanto yobida por reduci. Por ehempel, bao di emision halto combina cu un scenario di secura modera, e cantidad anual di yobida na Aruba por reduci cu 7.8% pa 2100. Bao di emision abao y secura modera, casi no tin cambio proyecta. E diferencia entre e scenarionan ta principalmente pasobra ainda no ta completamente cla con patronchinan atmosferico y fenomenonan manera El Niño lo cambia a medida cu clima mundial ta bira mas cayente.

A pesar di esaki, tendencia general pa Aruba y Corsou den mayoria di scenario ta un reduccion den yobida. E patronchi segun temporada probablemente lo keda mescos, cu mayoria di yobida concentra durante temporada di yobida. Loke principalmente ta cambia ta e cantidad. Reduccion relativo ta mas grandi durante periodonan cu ya ta seco, mientras reduccion absoluto mas grandi ta presenta durante temporada di yobida.

Pa Aruba, cu ya tin un clima relativamente seco, e scenarionan ta relevante pa planificacion riba termino largo. E rapport ta identifica maneho di awa, planificacion territorial, proteccion costero, conservacion di naturalesa, salud publico, energia y turismo manera areanan unda informacion climatico por yuda den evaluacion di riesgo y adaptacion. E estudio no ta calcula directamente consecuencia economico ni ta determina ki medida gobierno mester tuma. Su funcion ta provee un base cientifico pa evaluacion y pa tumamento di decision.

Aunke yobida ta un di e resultadonan mas notable, e señal tocante temperatura ta mucho mas consistente: den tur scenario Aruba lo sigui bira mas cayente.

Pa 2050, temperatura anual promedio ta proyecta pa aumenta entre aproximadamente 0.8 y 1.3 grado Celsius compara cu 1991-2020. Pa 2100, e diferencia entre scenarionan ta bira mas grandi. Bao di emision abao, aumento ta keda rond di 0.7 grado Celsius, mientras bao di emision halto e aumento proyecta ta entre 3.0 y 3.3 grado.

Un resultado importante ta cu dianan di calor extremo por bira mucho mas frecuente. Como punto di referencia, investigadornan a wak e dianan cu tabata entre e 5% mas cayente durante 1991-2020. Den e periodo ey, tabatin aproximadamente 18 di e dianan extremadamente cayente aki pa aña.

Pa 2050, cantidad di dia cu ta pasa e nivel aki ta aumenta considerablemente den tur scenario. Pa 2100, bao di emision halto, e calculacionnan ta indica cu e condicionnan cu durante 1991-2020 tabata pertenece na e dianan excepcionalmente cayente por presenta durante mayoria di aña.

Esaki no ta nifica cu Aruba lo tin exactamente e mesun temperatura extremo tur dia. E comparacion ta mustra cu temperatura cu den clima historico tabata relativamente raro por bira mas frecuente segun e promedio general ta subi. Ademas, datonan observa ta mustra cu e proceso di calentamento ya ta visible. Entre e tres islanan, aumento di temperatura observa na Aruba ta e unico tendencia di temperatura cu investigadornan a identifica manera estadisticamente significante.

E rapport ta confirma tambe aumento di nivel di lama, un riesgo cu ya a ser identifica den otro estudio.

Compara cu 1991-2020, nivel di lama ta proyecta pa ta aproximadamente 20 centimeter mas halto pa 2050. Pa 2100, e aumento proyecta ta rond di 50 centimeter bao di emision abao y cerca di 80 centimeter bao di emision halto. Den scenarionan cu probabilidad abao pero impacto potencial grandi, relaciona cu perdida acelera di ijs, un aumento ainda mas grandi no por ser exclui. Ademas, nivel di lama lo sigui aumenta despues di 2100.

Pa Aruba, esaki ta relevante pasobra un parti importante di actividad economico, ecosistema y infrastructura ta concentra cerca di costa. E rapport ta identifica inundacion costero, erosion, salinisacion, rif di coral y infrastructura costero manera areanan vulnerable na aumento di nivel di lama. Turismo ta particularmente relevante mirando e importancia di zona costero pa economia di isla.

E proyeccion nobo ta complementa advertencianan cu ya a aparece anteriormente tocante vulnerabilidad costero di Aruba. Diferencia principal ta cu e estudio actual ta forma parti di scenarionan climatico prepara specificamente pa Aruba, Corsou y Sint Maarten, combinando modelo climatico mundial cu dato y experticio local.

E rapport ta pone algun limite cla na su propio conclusionnan. E no ta inclui un analisis completo di horcan, yobida extremo, duracion di secura, aumento den nivel di acidez di lama ni algun otro riesgo climatico. E fenomenonan aki ta rekeri metodologia y modelonan adicional. Consecuentemente, e scenarionan mester ser mira manera un base pa evaluacion di impacto den futuro y no manera un inventario completo di tur riesgo climatico cu Aruba ta enfrenta.

E estudio ta mustra un futuro cu por varia considerablemente dependiendo di emision mundial y reaccion regional di clima, particularmente ora ta trata di yobida. Riba otro punto, direccion ta mucho mas cla: Aruba lo sigui bira cayente y nivel di lama lo sigui aumenta.

Pa yobida, e rango di posibilidad ta amplio. E scenario mas severo ta mustra cu Aruba por perde mas cu mitar di su yobida anual pa final di siglo, mientras e scenario mas modera ta mustra cambionan considerablemente mas chikito. Precisamente e diferencia ey ta un punto importante den interpretacion di e rapport: scenarionan no ta prediccionnan exacto, sino diferente posibilidad den futuro cu por ser uza pa prepara decisionnan cu tin consecuencia pa decadas.

E rapport ta pone un base cientifico mas specifico pa incorpora condicionnan climatico den planificacion di Aruba den futuro. E cifranan no ta determina exactamente con clima lo ta na 2050 of 2100, pero nan ta mustra e margen di cambionan pa cual e isla mester prepara.