Home Deporte RCA ta gana JTL

RCA ta gana JTL

429

Recientemente Tricolornan di Solito a enfrenta e Bufalonan di Tanki Leendert. Ya na halftime e score tawata 7-0 y e partido a termina 13-0 na fabor di RCA cu awor tin 18 punto y un averahe di gol di +21.

Esaki ta segun e relato cu nos a ricibi. Asina RCA a habri 2da buelta cu dos victoria, derotando Caiquetio siman pasa 3-1 y e siman aki JTL. Diabierna proximo pa 8or di anochi RCA “big wheel lottery powered by powerade” lo topa cu Britannia den un tremendo clash di calidad. Mester remarca cu den prome buelta Britannia a derota RCA 1-0 despues di 4 aña cu e Pumanan di Piedra Plat no por a gana e Soldatnan Tricolor di Solito. E siman completo tawata uno perfecto pe organisacion Tricolor, ya cu dialuna siman pasa den U17 RCA interprint a derota Riverplate 3-1 na Madiki, manteniendo invicto y prome puesto di e tabla. Diaranson U20 RCA welcome back snack a derota Estrella 1-0 y ta move pa 2do puesto ribe standing Junioren. Diabierna ultimo Dames Tricolor RCA Neutrogena a gana Estrella 3-0 y tambe ta mantene #1 di nan tabla di posicion. Mester remarca cu U15 RCA Wendys tambe ta domina su categoria. Fanaticada Tricolor ta invita diabierna awo den CDGPT pa bin apoya RCA vs Britannia, un partido importante cu Soldatnan di Solito mester gana pa por sigui avansa riba tabla division di honor.