Organisacion Tricolor su “farm system” ta sigui cosecha exito, despues cu dialuna anochi a derota Estrella 7-0 den e wega decisivo, cu 4 gol di Jean Pierre v/d Linden. E marcado a wordo habri pa Diqion Ras y Hugo Robert a amplia pa 2-0 cual score tawata na halftime.

Di dos tempo Champi ta drenta den un cambio y ta score tres gol rapido pa haci e wega 5-0. Mateo Velasco ta haci e wega 6-0 y Champi mes ta score su di 4 gol pa pone marcado final 7-0. E wega aki a atrae basta publico ya cu Estrella a termina campeonato regular na prome luga y den play-off final a derota RCA 1-0, aunke e prome wega di final RCA a gana Estrella 4-1. Directiva ta felicita e ekipo completo, staf cu a dedica 100% henter un aña y e fanaticada cu ayera atrobe tawata masha anima y a apoya cu hopi respet.

Invasion cordial ta pa diahuebs awo 8or den CDGPT ora RCA “Big Wheel Loterry powered by Powerade” bay busca su clasificacion pa final vs Britannia. Aki ta un pa tera y un pa lama. Soldatnan Tricolor ta completamente prepara pa e wega decisivo. Ambiente ta den man di DJ Edson y HP.