“Mi ta contento cu Ministerio Publico a haci esfuerso pa saca un relato di prensa riba mi keho na Hof cu titulo Parkietenbos.” Asina activista mr. Anouk Balentina a reacciona riba e relato di prensa cu Ministerio Publico, OM a publica riba su decision pa no persigui Gobierno pa e situacion di dump, ainda. Pero pa Balentina, e reaccion ta djis un ehempel di con duro e ta pa e como ciudadano busca su derecho. Pasobra OM no tabata kier ni a tuma su keho y e mester a bay Hof pa obliga OM pa sikiera tuma esaki.
“Mi a bay Hof tabata pasobra OM no kier a tuma keho nobo riba actividad ilegal riba dump, y tambe pasobra OM no kier actua penalmente riba infraccionnan riba Parkietenbos y e incinerador,” mr. Balentina a remarca, añadiendo cu e relato di OM tabata inclui diferente eror. Mescos ta conta pa e argumento di Hof. E activista, un hurista specialisa den legislacion a haya yamativo cu Hof, mescos cu OM, sin investigacion, ta considera cu pa motibo cu e incinerador tin hindervergunning, e ta legal. “Ainda no a hancra e hindervergunning formalmente,” Balentina a enfatisa, basa riba e hecho cu huez administrativo (Lar) a considera su protesta contra otorgamento di e hindervergunning como admisibel y a instrui Gobierno pa reacciona a base di contenido riba e obhecion. “E posibilidad e ora ta grandi cu huez por destrui e hindervergunning.”
E kehado a bira sospechoso… pa un dia
Balentina a repasa e proceso cu e mester a cana pa haya reaccion di OM, cu a haya espacio di Hof pa tuma su tempo, algo cu e mes no a haya. “Hancho pe, smal pa mi,” Balentina e remarca. “Riba dje, e mesun dia prome cu Hof a atende mi keho, mi a haya un deurwaarder pa bisa mi aparece den un, pa mi, caso desconoci riba e mesun ora. A informa mi cu mi ta un sospechoso.” Balentina a bisa cu el a sinti esaki como un intimidacion. Ora cu el a informa Hof di e caso desconoci, el a haya un notificacion di un fiscal pa “‘considera e yamada como no-manda. Pa claridad, bo no ta un sospechoso. Mi despensa pa manda un yamada incorecto.’” Anouk Balentina a considera e eror aki di OM hopi penoso y ta puntra cu si no por regla asunto asina, ta con ta bringa criminalidad. “Of e tabata un accion delibera? El a haci mi corda locual mi a lesa recien, cu ta ‘si bo denuncia di un delito worde trata manera cu si abo a comete un delito, e ora ey bo ta biba den un pais goberna pa criminal.’”
Paloke ta derecho como ciudadano, Anouk Balentina a spera mas di un Hof obhetivo.
E hurista a puntra si henter su trayectoria largo pa e procedura di keho tabata bale la pena. “Di otro banda un conclusion positivo ta cu Hof a reitera cu Gobierno tin te Januari 2023 pa sanea Parkietenbos, sino lo mester actua penalmente. Esey ta un advertencia of menasa cu si no actua, lo tin consecuencia. Si ami, como ciudadano, a sinta keto, nunca lo a bin un deadline asina.” Pero e ta nifica si cu mientrastanto Gobierno mester actua y hiba supervision riba e hindervergunning actual cu ta relata na e incinerador.
Di otro banda, Hof no a opina si e incinerador ta ubica y ta opera contra ley, particularmente e ROPv. Hof ta sali di punto di bista, sin argumentacion cu e otorgamento di e hindervergunning a sosode segun ley, locual no ta e caso, segun Balentina. “Y loke OM tampoco ta bisa den su relato di prensa, ta cu mi keho si tabata admisibel. Esaki ta nifica cu Hof no a honra e peticion di OM pa considera mi keho como no admisibel. E otro punto positivo importante ta cu Hof den su decision ta enfatisa cu basa riba hurisprudencia, hasta ambtenaar por keda persigui na momento di actua criminalmente. Di esey por conclui cu Hof absolutamente no a considera e keho como disparate.” E conclusion di autoridad hudicial, segun mr. Balentina ta cu su keho ta prematuro y cu mester warda conclusion di e procedura di Lar. “Pues, no ta cuestion si pero ki tempo ta persigui Gobierno.”
Ademas di a apela na Hof pa OM acepta su keho, Balentina a haci uso di un peticion a base di WOO, cu ta similar na e ley di transparencia di Aruba. El a puntra Ministerio pa Asuntonan Interior y Relacion di Reino, BZK, pa tur informacion relevante di Parkietenbos. E informacion a yega na dje net despues cu Hof a tuma su decision cu OM mester tuma e keho y ta informacion cu por a usa den e keho.
No ta un secreto cu mr. Balentina tin hopi aña ta bringa pa sanea dump y area y a hiba un lucha huridico contra e situacion ilegal. “Hopi di e lucha tabata tras di cortina, y p’esey mi no por kita di e pensamento cu netamente e autoridadnan cu mester proteha ciudadano contra inhusticia, ta actua den sincronisacion of den ekipo contra e ciudadano. Ta tene documentonan secreto of no ta duna nan na tempo, ta hala pruebanan un banda mientras cu no tin ningun instancia cu realmente ta para na banda di e ciudadano,” mr. Balentina a bisa. “Te dia di awe nos ta exponi diariamente na substancia toxico sin cu autoridadnan ta tuma accion concreto. Ta permiti actividadnan ilegal y Gobierno ta haya tempo di OM pa permiti situacionnan ilegal continua, a costo di bida di hende.
Otronan den Reino ta goza por lo menos di proteccion legal pa medio di e Ombudsman. Aruba ta e unico cu no tin un Defensor di Pueblo. E ciudadano Hulandes na Europa ta goza di proteccion legal y di leynan cu si ta keda implementa. E ta di lamenta, pasobra cada biaha cu pidi Hulanda ayudo pa garantisa derecho fundamental di hende, ta uza autonomia di Aruba como excuus.”
Mr. Balentina tin miedo cu ta spera pa e baca hoga prome. “E lucha di e sistema di Aruba ta keda pa e ciudadano un lucha di David contra Goliath. Problema ta cu ainda no por haya e piedra di David.”
