Stichting Educacion Digital enfoca riba yuda hobennan mas vulnerabel sigui nan studio

Un fundacion cu a cuminsa den aña 2019 ta enfoca riba yuda e hobennan cu no por a caba nan scol pa diferente motibo, y asina duna nan un ‘second chance’ den area di enseñansa pa nan logra nan metanan di bida.

Stichting Educacion Digital (SEDA) tin e mision di brinda enseñansa di calidad na hobennan cu ta pasando den un situacion dificil, unda ta fomenta nan habilidad-, balornan y ta desaroya consciencia pa nan progresa den nan bida, ofreciendo un oportunidad di estudio na tur hoben den situacion vulnerabel a traves di enseñansa digital y presencial.

Dia 15 di maart di 2020, SEDA a cuminsa cu proyecto Young Adults Moving On, unda nan tin gruponan obhetivo como hobennan cu a bira mayor mucho trempan, manera mamanan soltera, hobennan sin trabao y tambe esnan cu tin un discapacidad fisico.

Den combersacion cu Jessica Semeleer, kende ta voozitter di SEDA, el a splica cu oficialmente e fundacion tin un aña cu ta draai, caminda nan ta yuda diferente hoben conhuntamente cu otro fundacion y organisacionnan cu ta coopera cu nan den diferente aspecto. Algun di esakinan ta SKOA of Wit Gele Kruis, cu ta manda mucha.

Ta duna e lesnan na instalacionnan di EPI for di 2.30 te cu 4.30 di atardi y tur dia nan tin diferente vak den cual SEDA ta yuda e mucha of hoben, como por ehemplo cu wiskunde, Ingles, Spaño, Papiamento, informatica, y Hulandes. Ta duna e ayudo aki tanto pa esnan Arubiano como di nacionalidad Latino, specialmente esnan cu tin e problema na momento di drenta scol y tur cos ta wordo duna na Hulandes, nan ta ricibi guia durante henter un aña escolar.

Di esaki, tambe Semeleer a indica cu un hoben por siña papia Hulandes si e kier bay traha den area di hotel, por ehemplo. “E idea ta pa yuda esnan cu kier haya trabao y loke nos ta ofrece por yuda nan pa yuda nan mes pa un trabao of pa nan sigui studia”, el a sigura.

Tambe el a sigura cu nan ta duna cursonan di ICT, unda nan a acerca Universidad di Corsou e aña aki pa a cuminsa cu HVO y ICT pa Aruba, y asina e studiante por tin e diploma di Universidad di Corsou reconoci na Aruba. Esey tin un duracion di cuater aña.

Nan ta enfoca riba muchanan cu ta na scol secundario, pero tambe por acerca SEDA pa por inscribi unda cu si algun mucha no ta bay scol den dia e por bay SEDA, y esey tambe ta conta como cu e ta bayendo un scol.

Den caso cu un hoben ta haya problema cu no por drenta un scol, e tin e oportunidad cu SEDA lo duna guia durante un aña escolar riba e trayecto aki, manera Semeleer a sigura.

Na momento cu e hobennan ta culmina nan estudio, nan ta haya un certificado y nan ta wordo guia den un rumbo cu sin nan kier inscribi pa un Landsexamen nan por hacie, y esnan cu no por sigui e caminda ey – por ehemplo, e trayecto di Landsexamen ta mucho pisa pa nan – nan por sigui studia na Hulandes, pero na un nivel mas abao.

Semeleer a informa cu nan ta traha cu cuater periodo di 7 siman y e siguiente simannan ta pa un prueba pa wak kico nan a compronde durante e periodo ey. Na final nan ta haya nan certificado y nan por mira den cual direccion nan kier continua.

Igualmente Semeleer a enfatisa cu nan ta traha cu diferente docente cualifica y certifica cu ta duna les por ehemplo na un mucha muhe cu a sali na estado y su bida a cambia cu e nacemento di un baby, unda e tempo pa siña ta un poco mas limita. Di esaki, Semeleer a declara cu esey no ta un problema pa motibo cu SEDA ta duna lesnan digital, no necesariamente e mester ta presente den klas. E lesnan ta graba caba caminda e persona por subi riba e website y studia.

Tambe nan ta duna e opcion den caso cu e mama no tin un persona pa cuida e baby riba e dia di un prueba, e por bay cu e baby na e prueba y nan ta cuida di dje aparte. “Nos tin un grupo di mama cu a bin cu nan yiu y nos ta pone nan hunto y nan ta cuida di otro mientras e mama ta haciendo su proofer”, el a bisa.

Studiantenan su edad ta varia entre 12 te cu 30 aña, unda nan ta dicidi si kier studia via online of den klas cu e docentenan. Igualmente Semeleer a comenta cu nan tin boluntarionan cu ta traha hunto cu nan yudando e muchanan. Por ehemplo, den caso tin algun cu no por bay scol pa falta di transporte, un persona mes di SEDA ta busk’e te na su cas pa atende cu su les y hib’e su cas back, of nan ta haya un ayudo pa nan por yega nan cas.

Aruba ta un isla cu tin hopi problema social, unda cu den cierto caso e mucha- y hobennan ta wordo afecta specialmente pa bay scol. Semeleer a expresa cu fundacion y organisacionnan mes ta tuma contacto cu SEDA pa asina por yuda nan bay den un bon direccion y sigui cu nan estudio.

“Nos ta traha cu hopi amor, cu hopi pasion pa yuda e muchanan den tur forma cu nos por”, Semeleer a enfatisa.

Na momento cu e persona ta inscribi na SEDA, ta yama nan pa un entrevista y ta splica e persona e kalender unda nan lo traha for di dialuna te cu diahuebs.

Pa finalisa, Semeleer a informa cu nan ta traha den cooperacion cu CEDE Aruba, cu ta esun cu ta sponsor nan, igualmente cu EPI cu ta esun cu ta pone nan lokaalnan disponibel pa muchanan por haya nan les.

Semeleer a expresa cu na e momentonan aki nan a cuminsa cu inscripcionnan na unda personanan interesa por subi riba e website: www.sedaruba.org y busca e formulario of registra pa inscribi, igualmente diferente fundacionnan y organisacionnan ta manda nan e candidatonan.