Manera anuncia ayera, nos ta sigui papia cu comerciantenan riba e decision di gobierno pa aumenta e salario minimo y ki efecto esaki tin riba comercio. Tin comerciante cu ta reacciona negativo, otro ta mira cu tin mas trabou cu mester wordo haci banda di aumenta y Camara di Comercio ta bisa cu nan ta ‘disgusta’.
Un comerciante cu kier keda anonimo ta splica nos: e anuncio recien di aumento di salario minimo ta algo hopi bon cu gobierno ta haciendo pa yuda cu costo di bida. Sinembargo, no ta tur gremio comercial of comerciante a keda contento cu e decision aki mas tanto pa falta di dialogo di parti di gobierno, y na e manera cu el a wordo introduci.
Pa comerciante Hubert Dirks di Compra, e cambio aki no lo nifica hopi mirando cu e no tin hopi empleado cu ta gana salario minimo. E ta comparti cu nos si su opinion cu e problema ta mas tanto cu e decision no a wordo dialoga cu gremionan concerni. E comerciante ta haya cu mester bin cambio den structura di labor. “Ami no lo tin problema si e salario minimo ta mas halto. Loke nos kier ta pa haya un proeftijd mas largo”, sr. Dirks ta splica nos. Si por subi e salario minimo, comerciantenan kier mira cu gobierno ta duna nan un tempo di prueba di por ehempel seis luna. “Asina nos lo no mester uza uitzendbureau. Despues di seis luna ta dicidi e ora si e empleado ta bay vaste dienst of no, den dos luna bo no por mira si un persona ta traha bon of no, e ta mucho cortico. Pa e persona siña e trabao, wak su actitud di trabao ta cosnan hopi dificil pa haci den dos luna. E ta hopi anticua.”
Ilegalidad den comercio
E comerciante ta sigui bisa: “Si bo haya hende local cu bo mester paga salario minimo di 1.700 florin anto bo topa por ehempel cu hende di exterior cu ta traha pa 1.000/1.400, tin hopi hende cu tin construccion cu no ta worry y ta laga bo traha facilmente.” Sr. Dirks ta elabora cu den e mundo di limpiesa y construccion ta hopi hende ta gana salario minimo. Na e momento ey segun e ta splica nos, si nos bira mucho caro, bo ta habri porta pa mas hende indocumenta haya trabao. “Bo tin cu combati ilegalidad pareu cu ahusta salario minimo.”
Comentarionan riba rednan social tambe ta subraya cu e decision aki ta mustra mas manera un ‘stunt politico’ pa purba di gana voto. “Laga nos bisa cu bo a pone un contract cu un negoshi, anto bo a calcula a base di un salario di tanto. Diripiente ta subi e anto bo no por bay cerca bo opdrachtgever pa subi e contract,” sr. Dirks ta splica. Comerciantenan ta di opinion cu ora gobierno ta tuma decisionnan asina, mester tene cuenta cu contractnan ta cuminsa na comienso di aña. “Comercio no tin contract cu hende, pero cu supermercadonan, hotelnan. Anto si bay subi nos gastonan di anochi pa mainta nos tin un problema bastante grandi.”
Reaccion Camara di Comercio
“Nos ta sumamente disgusta. Nos no ta contento con esaki a bin sin consulta cu nos como Camara di Comercio”, presidente Ernst Mohamed a declara ayera durante un rueda di prensa. Sr. Mohamed ta bisa cu no ta cu Camara di Comercio ta contra aumento di salario minimo, pero si di e forma con el a wordo introduci ya cu e lo tin su impacto. “Atrobe comercio tin cu bay paga pa algo cu gobierno ta imponi. Bo ta bay puntra bo mes, te na unda esey ta bay?” Nan tin cu ahusta prijs y esaki lo por trece aumento di prijs of inflacion. Generalmente e tipo di aumento aki ta tuma luga na apertura di aña y no na bispo di eleccion, manera a sosode e biaha aki.
Sr. Mohamed: “Bo tin cu wak ki ora bo tin cu bin cu algo asina y si e ta prudente pa hacie. Pa motibo cu no ta facil manera bo ta wak awo, mas gasto pa e comerciante pone den prijs di producto. Y na final di dia bo no a bay dilanti niun tiki pasobra mi a duna bo cien florin di aumento, pero e comerciante ta bay hisa na 150 florin kiermen bo a sali perdi.”
