Departamento di Higiena y Inspeccion di Alimento ta na haltura di e situacion cu a surgi na Hulanda relaciona cu webo contamina cu insecticida y cu a wordo detecta den otro paisnan di Europa; y kico ta su consecuencia pa Aruba.

E directora di e departamento aki, Yvette Geerman a declara na Bon Dia Aruba cu nos sa haya webo cu ta bini for di Hulanda y Europa. Pero a base di informacion compila, e tipo di webo contamina aki no a drenta na Aruba. “Nos ta keda atento y pendiente den caso cu webonan cu ta yegando for di Hulanda, si nan ta drenta Aruba. Nan no a yega ainda.”

Nos autoridad na Aruba ta keda pendiente den todo caso; ya cu ta existi e posibilidad cu e webonan aki por yega Aruba. Tin supermercado cu ta importa hopi producto for di Hulanda. Sra. Geerman ta bisa cu ora cu nan ta importa entre otro webonan ta Directie Economische Zaken ta esun cu ta duna permiso pa esaki. Departamento di Inspeccion di Alimento cu ta resorta den departamento di Salubridad Publico, tin contacto cu nan pa asina nan por tin un bista di e establecimento comercial cu ta trece e webonan for di Hulanda of Europa pa Aruba.

Inspeccion
Sra. Geerman ta indica cu oficialmente nan no a haya nada ainda na Aruba y mirando cu e departamento cu ta yama Voedsel en Waren Autoriteiten ta haciendo nan inspeccion na Hulanda mes; nan ta tumando nan paso ayanan entre otro sacando e webonan contamina for di mercado; y nan lo canalisa cualkier informacion pa nos. Te aworaki nos no a wordo poni na haltura cu tin webo contamina na caminda pa Aruba.

Si den caso e tipo di webonan aki drenta Aruba logicamente cu nan no lo duna un conseho positivo di manera cu e no por drenta Aruba. “Pueblo di Aruba mester keda trankil. Nos como autoridad ta keda pendiente ora cu cosnan ta sosode di afo, ya cu nos ta traha cu autoridadnan internacional. Nos ta wordo poni na haltura”.

El a splica cu mirando cu e caso aki tin di insecticida cu a contamina e webonan produci den e chicken farm Hulandes, nos pais ta depende di e normanan aplica pa Hulanda. Tambe di e control di parti di nan, ya cu nos no tin laboratorio asina sofistica cu nan por haci investigacion pa detecta e presencia di contaminacion den e webonan aki. Den e caso aki nos ta depende semper riba Union Europeo y di Merca, ya cu Aruba ta traha hunto cu nan riba e tereno aki.

Na momentonan cu tin cosnan cu ta drenta por ehempel e tipo di contaminacion aki, nos autoridad local ta wordo avisa via di canalnan oficial y confiabel pa haya e productonan aki bek. E canal ta entre otro Departamento di Relacion Exterior via European Food Safety Authority. Logicamente departamento di Salubridad Publico tambe ta wordo poni na altura riba cierto productonan ora cu ta surgi algo. Pues den caso asina nan como departamento ta keda pendiente y alerta riba un situacion asina.

Investigacion
Sra. Geerman ta haya cu pueblo no mester ta spanta; ya cu si ta berdad cu esaki ta un situacion cu a sosode na Hulanda; y e no ta descarta cu e por drenta Aruba, pero nos tin canal confiabel cu autoridadnan di afo cu tambe ta keda pendiente pa nos.

E ta un norma na Hulanda y tanto na Europa nan normanan ta hopi halto. “Mirando e gravedad cu e por tin pa e salud di hende na Hulanda mes, nan ta haciendo hopi investigacion”. A base di investigacion aki nan ta determina cu e cantidad cu bo mester consumi di webonan mester ta basta halto pa bira malo.

Sra. Geerman ta trece trankilidad den nos comunidad sigurando cu e no ta un cos hopi alarmante; pero esey no ta descarta cu nos autoridad local ta keda na haltura. E ta aprecia cu semper nos pueblo ta keda critico, pero como autoridad di salud publico nan ta realisando nan trabou di supervision.