Ora el a nace, e baby muhe su peso tabata mescos cu un appel. Un hospital na San Diego diaranson a revela nacemento di e baby, y a bisa cu e ta e micro-preemie sobreviviente di mas chikito di mundo, kende a pisa apenas 245gram ora el a nace na december.
E mucha muhe a nace na 23 siman y tres dia di embaraso di su mama. Dokternan a bisa e tata despues di e nacemento cu e lo tin como un ora cu su yiu muhe prome cu e fayece. “Pero e ora ey a bira dos ora, cual a bira un dia, cual a bira un siman”, e mama a bisa den un video revela pa Sharp Mary Birch Hospital for Women & Newborns.
Mas di cinco luna a pasa, y el a bay cas como un baby saludabel, pisando 2kg. Famia di e baby a duna permiso pa comparti e storia, pero kier keda anonimo, e hospital a bisa. Nan a permiti e baby uza e nomber cu e nursenan tabata uza: ‘Saybie”.
Su posicion como e baby di mas chikito cu a sobrevivi den historia ta segun e Registro di Baby mas Chikito di Universidad di Iowa. Dr. Edward Bell, un profesor di pediatria na Universidad di Iowa a bisa cu Saybie tabatin e peso mas abou confirma medicamente den e registro. Pero ‘no por descarta baby mas chikito ainda cu no a wordo reporta na e registro’.
E hospital a bisa cu e baby oficialmente a pisa 7 gram menos cu e baby di mas chikito anteriormente, kende a nace na Alemania na 2015.
E baby ta enfrentando retonan enorme como un micro-preemie, kende ta un infante naci prome cu 28 siman di gestacion. Babynan micro-preemie por experiencia problema di oido, desaroyo, y otro complicacionnan. Hopi no ta sobrevivi un aña, segun Michele Kling di March of Dimes, un organisacion sin fin di lucro cu ta traha pa mehora condicionnan pa e mama y babynan.
