sostenibilidad refineria.jpg

Tin margen di ganashi practicamente garantisa. Esaki director di e compania estatal nobo,  Refineria di Aruba (RdA), Alvin Koolman ta sigura. Esaki riba preguntanan con e compania lo traha ganashi den un mundo unda e prijs di petroleo ta abou.

 

Pa duna contenido na su palabra y contestando inkietud di prensa, si nos refineria ainda por produci y genera entrada cu lo por garantisa su sostenibilidad, Sr. Koolman a indica cu operacion di refineria na San Nicolas ta ainda un negoshi sostenibel, tanto pa pais Aruba como pa Citgo.

 

Sostenibilidad

E experto y director di RdA a bisa cu nos refineria ta un upgrader of mehorado di crudo. Kiermen e ta bira parti di e proceso necesario di produccion di crudo y no parti di e refinacion di e crudo, mas cu e nomber ta keda refineria.

E ta splica na placa chikito cu basicamente e prijs di un crudo extra pisa (extra heavy crude),  manera e crudo di Orinoco na Venezuela cu lo wordo mehora na Aruba, ta duna un margen di ganashi practicamente garantisa.

 

E ta un crudo cu segun Sr. Koolman- no tin balor pe, pasobra su balor ta su gasto pa extrae. E ta splica cu hopi estudio a mustra cu e crudo aki tin un balor di 4 dollar pa extrae bou tera te na porta di Jose cu ta e refineria situa na Puerto La Cruz na Venezuela.

Sr. Koolman a saca su som bisando cu si na e 4 dollar aki lo pone 1.50 dollar mas acerca pa trece e crudo te na Aruba, e ta bira 5.50 dollar. Esaki ta loke lo costa e bari pa bin cu e crudo aki pa Aruba. Banda di esey, e operacion na Aruba basa riba e proceso mes ta costa alrededor di 6.50 dollar pa mehora e crudo di Orinoco Venezolano den nos refineria. Kiermen entre 11 pa 12 dollar lo ta e gasto di e crudo produci na Aruba.

 

Actualmente e crudo ta alrededor di 40 pa 45 dollar bari. Mientras cu e crudo sintetico cu lo wordo produci na Aruba ta costa 7 dollar menos cu esey. “Pues tin un diferencia di casi 30 dollar caba cu e ta bay genera.” Igualmente e ta bisa cu mas tanto e prijs lo subi mas hopi nan lo gana. P’esey mes durante henter e periodo cu crudo a cay te hasta na 30 dollar bari, Venezuela a keda produci, ya cu specialmente e upgrader ta esun cu ta gana placa actualmente.

 

Importancia

Sr. Koolman a indica cu nos refineria ta importante pa Venezuela, ya cu e pais bisiña aki no por produci niun bari extra di petroleo, sino pasa pa un mehorado di crudo.

 

“P’esey Aruba ta asina importante pasobra pa un mehorado (upgrader) di crudo manera Aruba por wordo construi for di awor, e ta tarda entre 5 pa 7 aña y e ta costa alrededor di 7 mil miyon dollar”, segun Sr. Koolman.

 

Pa medio di e acuerdo firma cu RdA pa lease e refineria na San Nicolas, Citgo ta haya un facilidad cu den 18 pa 24 luna nan ta cuminsa procesa caba, y ta costa alrededor di 500 pa 600 miyon dollar. Ademas e ta cerca for di e costanan di Venezuela. Tambe lo tin un inversion di 200 miyon dollar riba e linea di gas cu mester bini pa Aruba.

LEAVE A REPLY

Please enter your comment!
Please enter your name here