Nos ta cuminza mira señal cu ta indica cu e promer pasonan ta tumando lugar pa yega na e reformanan acorda, pero di cual nos no a mira mucho desde inicio di e pandemia y e promer acuerdonan haci pa por fia placa.

Nos tabata hopi critico riba e actuacion di gobierno cu tabata mustra tur signo di ‘lastra pia’ pero awor si a yega e momento pa actua. Ta keda ainda e pregunta con efectivo esey ta bay ta, pero esey ta keda pa despues. Un di medidanan cu no por a pospone mas ta e limitacion di overtime den e aparato publico. Esey ta sigur un medida necesario mirando cu e ta ocasiona un ‘cost overrun’ grandi, di manera cu gobierno no por cumpli cu e compromisonan estableci pa presupuesto 2022.

Inmediatamente ta bin reaccion di banda di e sindicatonan envolvi, cu ta defende derecho di nan miembronan. Loke ta nan tarea como sindicato, pero den e cuadro aki ta necesario pa puntra ta cual ‘derecho’ nan miembronan tin den overtime sin limite? Acaso no ta asina cu 40 ora extra pa luna ya ta bastante? Banda di e aspecto cu e ta costa placa, tin tambe semper e consideracion di ‘proteccion di e empleado contra su mes’…

Claro cu ta bunita pa hiba luna tras luna dos salario completo cas, mas facil pa paga auto, cas y tur otro cos bunita cu bida ta brinda…, pero esey mester ta un ‘derecho’? Ta riba cual planeta e hendenan aki ta biba? Ademas, gobierno a dicidi di permiti 40 ora pa luna, loke ainda ta haci posible pa aumenta salario cu alrededor di 25%; un bunita suma na nos parecer.

Y pa tur claridad: nos no ta tuma e posicion aki pa defende gobierno, esey nan mes por, manera nos sa expresa mas biaha. Nos ta trece esaki dilanti pasobra porfin, despues di hopi aña di tolera e tipo di desorden aki den gobernacion, gobierno a dicidi di actua. Esaki ta hopi despues cu gobierno a haya un rapport di e consehero segun ley di gobierno di Reino y di Aruba, CAft, cu a haci un bon analisis di e abusonan cu tabata sucede cu overtime den gobernacion. Y si e sindicatonan kier engaña esnan eyfor cu no conoce e situacion di paden, nan por haci esey, pero no ta posible engaña hende cu experiencia den aparato publico, cu conoce di cerca ta con ta organiza e proceso aki di tal forma cu un grupo considerable por beneficia di esaki. Ta dificil pa desmenti cu e abusonan di overtime ta relaciona cu e famoso cancer di AO, cu den gobierno ta como tres biaha mas halto cu den sector priva. Hopi hende AO henter ora ta conveni tur hende, pasobra ‘somebody’ lo mester haci e trabao, toch?

Esaki ta mustra tambe cu e paso cu gobierno a tuma ta bon, pero a laga e duda si a haci esaki solamente pa consideracion financiero, y no pa sanea un asunto cu tin hopi aña putri caba. Si e idea ta pa sanea e situacion, anto ta necesario pa cuminza anda di otro manera cu e fenomeno di ‘dal AO’. Si no ta bin medida mas estricto di control di AO, anto ta tanto tempo e medida aki ta wanta, pasobra e servicionan na vanguardia di e lucha pa e ‘derecho’ aki lo pone gobierno dilanti di par di escogencia hopi fastioso.

Sin embargo, ora bay analiza ta pakico tin tanto hende AO henter ora, ta bin haya sa cu traha den gobierno ta haci hende malo. No ta esnan cu ta probecha tuma AO pa e colega por traha overtime so ta na cas varios biaha pa aña. Tin hende cu en principio ta bon empleado cu ta haya ‘burnout’ genuino, sin cu e situacion laboral ta cambia na nan fabor. Y ta aki nos ta yega na e problema mayor cu tin den gobernacion, cu ta existi bao di cualkier color politico cu ta na mando na cierto momento. Ineficiencia den gobernacion tin varios aspecto. Uno ta cu demasiado hende riba payroll toch no ta logra cumpli cu e tareanan planea of obligatorio. Esey ta trece e contradiccion cu tin trabao ta keda benta sin haci, pero tambe cu tin hende di bon curazon cu ta purba haci mas cu nan por, y ni sikiera ta haya un danki pa esey. Al contrario, ta nan papelnan di promocion ta keda pega, sea na e departamento mes, o na e famoso departamento di recurso humano, cu pa varios motibo lo mester ta e promer pa pasa den un proceso di reforma, pasobra nos no por comprende con gobierno ta bay entama reforma y restructuracion den otro departamentom si e instrumento cu nan mester usa, esun di recurso humano, a logra build up un reputacion solido di ineficiencia y inefectividad.

Por cierto den e dianan aki nan a sali bin dilanti cu un accion positivo di un maneho nobo a base di prestacion, algo di aplaudi, pero cu tabata objeto di lucha mas di 20 aña pasa caba. Spera nan logra, pasobra nos no a tende di ningun cambio di ley ni di manera di traha… Con bo ta bay paga segun prestacion si bo no a cambia nada den e cuadro legal? Tur esaki ta parti di e ‘window dressing’ grandi cu ta tumando lugar actualmente? Reforma ta hopi mas cu presenta pantaya…

LEAVE A REPLY

Please enter your comment!
Please enter your name here