(AFP) – Solicitantenan di asilo cu ricibi refugio na Reino Uni lo mester paga $13.000 pa nan acomodacion si nan tin entrada suficiente despues cu permiti nan keda, gobierno Britanico a bisa diamars.
Esaki tabata entre e reglanan nobo estricto introduci na Parlamento diamars, den un intento di reduci e cantidad di inmigrante iregular, cu lo drenta na vigor pa fin di aña.
“Britania semper a ofrece santuario na esnan cu ta huy for di guera y persecucion,” minister di Interior Shabana Mahmood a bisa den un declaracion. “Pero e sistema aki ta sobrevivi solamente si publico confia cu e ta husto, controla y no ta habri pa abuso.”
Ministerio di Interior no a bisa cuanto e personanan aki lo mester gana prome cu rekeri nan haci e pago mensual.
Inmigracion ta un topico controversial politicamente y a yuda impulsa partido anti-inmigrante Reform UK, cu encuestanan sugeriendo e por gana e proximo eleccion general cu lo tuma luga na 2029.
E minister di Interior ta mantene “rutanan nobo legal y safe pa refugiadonan,” banda di reforma na derechonan humano y leynan moderno di sclavitud cu lo “preveni e abuso di e sistema di asilo.”
Gobierno a bisa cu el a inverti alrededor di £4 biyon riba acomodacion y sosten a solicitantenan di asilo na 2025, cu e ministerio di Interior calculando cu e costo pa persona pa anochi tabata entre £23.25 pa £144.
E costo tabata “demasiado halto,” segun Mahmood.
Madeleine Sumption, director di Migration Observatory na University of Oxford, a bisa cu ta tiki probable cu hopi refugiado lo tin un entrada suficientemente halto pa cubri cualkier gasto.
“Un parti relativamente chikito di hende cu ricibi asilo lo tin un entrada suficientemente halto pa por contribui na e plan,” el a bisa e asociacion di prensa.
E impacto riba finanzas publico probablemente lo ta chikito, pa motibo cu esaki ta un pago dependiente riba e entrada pa un poblacion cu tin ingreso sumamente abao.”
Imran Hussain, director di asuntonan externo na e Conseho di Refugiado a bisa cu e ta “un impuesto extra riba refugiadonan” y esaki lo ta “inhusto, impractico y lo haci hopi mas dificil pa famianan por reconstrui nan bida y para riba nan propio pia.”
Gobierno ta reporta cu ya caba a spaar £1 biyon pa medio di transferi solicitantenan di asilo for di hotel na otro acomodacion manera basenan militar.
